ކޮލަމްބިއާގައި ކުރިއަށްދާ ކޮޕް 16 ގެ ހަވާސާގައި، އެންވަޔަރަންމަންޓް، ކްލައިމެޓް ޗޭންޖް އެންޑް އެނާރޖީގެ މިނިސްޓަރ ޠާރިޤް އިބްރާހީމް، ކޮންވެންޝަން އޮން ބަޔޮލޮޖިކަލް ޑައިވަރސިޓީ (ސީބީޑީ) ގެ އެގްޒެކެޓިވް ސެކްރެޓަރީ އަސްޓްރިޑް ޝޯމޭކަރއާ ބައްދަލުކުރައްވައިފިއެވެ.
އެންވަޔަރަންމަންޓް މިނިސްޓްރީން ބުނީ މި ބައްދަލުވުމުގައި، ކުންމިންގ-މޮންޓްރިއަލް ގްލޯބަލް ބަޔޯޑައިވަރސިޓީ ފްރޭމްވަރކް ތަންފީޒުކުރުމުގައި ހުރި ކުރިއެރުންތަކާއި ގޮންޖެހުންތަކާ ބެހޭގޮތުން މަޝްވަރާކުރެވުނު ކަމަށެވެ. އަދި މިހާރު ކުރިއަށްދާ މަޝްވަރާތަކާ ބެހޭގޮތުންވެސް ދެ ފަރާތުން ވާހަކަދެއްކެވި ކަމަށް މިނިސްޓްރީން ބުންޏެވެ.
މި ބައްދަލުކުރެއްވުމުގައި މިނިސްޓަރ ޠާރިޤް ވަނީ ދިވެހިރާއްޖެއިން ބަޔޯޑައިވަރސިޓީ ރައްކާތެރިކުރުމަށް ކުރަމުންދާ މަސައްކަތްތަކާއި، މި ދާއިރާއިން ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުއްވާލައްވާފައެވެ. އަދި ބަޔޯޑައިވަރސިޓީ ހިމާޔަތްކުރުމަށް ބައިނަލްއަޤްވާމީ އެއްބާރުލުމުގެ މުހިންމުކަން މިނިސްޓަރ ފާހަގަކުރެއްވިއެވެ.
Advertisement
ކޮޕް 16 އަކީ ޔުނައިޓެޑް ނޭޝަންސް ކޮންވެންޝަން އޮން ބަޔޮލޮޖިކަލް ޑައިވަރސިޓީގެ ދަށުން ބޭއްވޭ މުހިންމު ބައްދަލުވުމެކެވެ. މި ބައްދަލުވުމުގައި ދުނިޔޭގެ ގިނަ ޤައުމުތަކުން ބައިވެރިވެ، ބަޔޯޑައިވަރސިޓީ ރައްކާތެރިކުރުމާ ގުޅޭ މުހިންމު މަޝްވަރާތައް ކުރިއަށްދާނެއެވެ.
