ކޮލަމްބިއާގައި ކުރިއަށްދާ ސީ.އޯ.ޕީ 16 ގައި ބައިވެރިވެވަޑައިގަތުމަށް ވަޑައިގެން އުޅުއްވާ ޕްލެނެޓްގެ ޗީފް އިމްޕެކްޓް އޮފިސަރ އެންޑްރޫ ޒޮލީއާ އެންވަޔަރަންމަންޓް، ކްލައިމެޓް ޗޭންޖް އެންޑް އެނާރޖީގެ މިނިސްޓަރ ޠާރިޤް އިބްރާހީމް، ބައްދަލުކުރައްވައިފިއެވެ.
އެންވަޔަރަންމަންޓް މިނިސްޓްރީން ބުނީ މި ބައްދަލުވުމުގައި ދިވެހިރާއްޖެއަށް ދިމާވެފައިވާ ތިމާވެށީގެ ގޮންޖެހުންތަކާ ބެހޭގޮތުން މަޝްވަރާކުރެއްވި ކަމަށެވެ. އަދި މި ގޮންޖެހުންތަކަށް ޙައްލު ހޯދުމަށް ޕްލެނެޓްގެ ސެޓެލައިޓް ޑޭޓާ ބޭނުންކުރެވިދާނެ ގޮތްތަކާ ބެހޭގޮތުން ވާހަކަދެކެވުނު ކަމަށް މިނިސްޓްރީން ބުންޏެވެ.
ޚާއްޞަކޮށް ގޮނޑުދޮށް ގިރުމުގެ މައްސަލަ ބެލުމާއި، ދިރޭތަކެތީގެ މާހައުލު ރައްކާތެރިކުރުމާއި، މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލުކަން އިތުރުކުރުމަށް ޕްލެނެޓްގެ ސެޓެލައިޓް ޑޭޓާ ބޭނުންކުރެވިދާނެ ގޮތްތަކެއް ދެނެގަތުމަށް ވެސް މި ބައްދަލުކުރެއްވުމުގައި މަސައްކަތްކުރެވުނު ކަމަށް މިނިސްޓްރީން ބުންޏެވެ.
Advertisement
މިނިސްޓަރ ޠާރިޤް އިބްރާހީމް ވިދާޅުވީ، ދިވެހިރާއްޖެއަކީ ކުދި ޖަޒީރާ ޤައުމަކަށްވެފައި، މޫސުމަށް އަންނަ ބަދަލުތަކުގެ ސަބަބުން ވަރަށް ބޮޑަށް އަސަރުކުރާ ޤައުމަކަށް ވާއިރު، މި ކަންކަމާ ކުރިމަތިލުމަށް ޒަމާނީ ޓެކްނޮލޮޖީގެ އެހީ ހޯދުމަކީ ވަރަށް މުހިންމު ކަމެއް ކަމަށެވެ.
ޕްލެނެޓްގެ ޗީފް އިމްޕެކްޓް އޮފިސަރ އެންޑްރޫ ޒޮލީ ވިދާޅުވީ، ސެޓެލައިޓް ޑޭޓާ ބޭނުންކޮށްގެން ދިވެހިރާއްޖޭގެ ތިމާވެށި ރައްކާތެރިކުރުމަށާއި، މޫސުމަށް އަންނަ ބަދަލުތަކާ ކުރިމަތިލުމަށް އެހީތެރިވެދެވޭނެކަމަށެވެ.
