މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑިރެކްޓަރުންގެ ބޯޑުން އިބްރާހިމް ނޫރައްދީން ވަކިކޮށްފިއެވެ.

އެ މަޤާމުން ނޫރައްދީން ވަކިކޮށްފައިވާކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނިންމިކަން އެމްއޭސީއެލް އަށް އަންގާފައިވަނީ މިދިޔަ ބުރާސްފަތި ދުވަހުއެވެ.

ނޫރައްދީން އެ މަޤާމުން ވަކިކުރުމާއެކު އެމްއޭސީއެލްގެ ޑިރެކްޓަރުންގެ ބޯޑުގައި މިވަގުތު ތިއްބެވީ ފަސް ބޭފުޅުންނެވެ.

ބޯޑުގައި މިވަގުތު ހިމެނޭ ބޭފުޅުންނަކީ:

• އިބްރާހިމް ޝަރީފު މުހައްމަދު (ކުންފުނީގެ ސީއީއޯ)
• އިބްރާހިމް ސިޔާދު ގާސިމް
• އިބްރާހިމް މަހުދީ
• ސަހަރު ވަހީދު
• މުހައްމަދު ރިޔާޒް

ނޫރައްދީން އެމްއޭސީއެލްގެ ބޯޑަށް އައްޔަންކުރައްވާފައިވަނީ 2019 ވަނަ އަހަރުގެ މާޗްގައެވެ. އޭނާ ވަނީ ކުރީގެ ރައީސް މުޙައްމަދު ނަޝީދުގެ ވެރިކަމުގައި އެމްއޭސީއެލްގެ ޗެއާމަންކަންވެސް ކުރައްވާފައެވެ. ނަމަވެސް ޖޫން 28، 2010 ގައި އޭނާ ވަނީ އެ މަޤާމުން ވަކިކޮށްފައެވެ. އޭރު އޭނާ އެ މަޤާމުން ވަކިކޮށްފައިވަނީ އެއާޕޯޓު ހިންގުން އިންޑިއާގެ ޖީއެމްއާރު ކުންފުންޏާ ޙަވާލުކުރުމުގެ ކުރިން އެއްބަސްވުން އިވެލުއޭޓް ކުރުމުގައި ހިނގައިދިޔަ ހިޔާލުތަފާތުވުންތަކަކާ ގުޅިގެންނެވެ.