އެމެރިކާގެ އެންމެ އުމުރުން ދުވަސްވީ މީހާ ކަމުގައިވާ އެލިޒަބެތް ފްރާންސިސް، އުމުރުން 115 އަހަރުގައި މަރުވެއްޖެއެވެ. ފްރާންސިސް މަރުވީ ގުދުރަތީ މަރަކުން، މިދިޔަ އަންގާރަ ދުވަހުއެވެ.
ދުނިޔޭގެ އެންމެ ދުވަސްވީ މީހުންގެ ޑޭޓާބޭސް ކަމަށްވާ ލޯންގޭވީކުއެސްޓް އިން ހާމަކުރި ގޮތުގައި ފްރާންސިސް މަރުވިއިރު، އޭނާއަކީ ދުނިޔޭގައި ހުރި ތިން ވަނައަށް އެންމެ އުމުރުން ދުވަސްވީ މީހާއެވެ. "އޭނާއަކީ ހިއުސްޓަންގެ އައިކަންއެއް އަދި މުޖުތަމައުގެ ވަރަށް ލޯބިލިބިފައިވާ އަންހެނެއް،" ޑޭޓާބޭސްއިން ނެރުނު ނޫސް ބަޔާނެއްގައި ބުންޏެވެ.
1909 ވަނަ އަހަރުގެ ޖުލައި މަހު ލުއިޒިއާނާގައި އުފަންވި ފްރާންސިސްއަށް ވަނީ އެމެރިކާގެ 20 ރައީސުންގެ މަސައްކަތްތައް ފެނިގެން ގޮސްފައެވެ. އޭނާ އުފަންވިއިރު، އެމެރިކާގެ ވެރިކަން ކުރަމުން ދިޔައީ ވިލިއަމް ހޮވާޑް ޓަފްޓެވެ.
Advertisement
ފްރާންސިސްއަކީ ޓެކްސަސްގެ ހިއުސްޓަންގައި ގިނަ ދުވަސްތަކެއް ވަންދެން ދިރިއުޅެމުން ދިޔަ މީހެކެވެ. އޭނާ މަރުވުމާއި ހަމައަށް ދިރިއުޅެމުން ގޮސްފައިވަނީ އޭނާގެ 95 އަހަރުގެ އަންހެން ދަރިފުޅު ޑޮރޮތީ ވިލިއަމްސް އާއި އޭނާއަށް މާމަ ކިޔާ ދަރިފުޅު އެތެލް ހެރިސަންއާ އެކުގައެވެ.
ފްރާންސިސް އެންމެ ފުރަތަމަ ހިއުސްޓަންއަށް ބަދަލުވީ އޭނާގެ އުމުރުން 11 އަހަރުގައި މަންމަ މަރުވުމާއި ގުޅިގެންނެވެ. އޭގެ ފަހުން އޭނާ ބަލައި ބޮޑުކުރީ އޭނާގެ ބޮޑުދައިތައެވެ. އޭނާގެ މަސައްކަތުގެ ދިރިއުޅުމުގައި، 1970-1980ގެ އަހަރުތަކުގައި ހިއުސްޓަންގެ ޓީވީ ސްޓޭޝަނެއްގައި ކޮފީ ޝޮޕެއް ހިންގުމުގައި އުޅެފައިވެއެވެ.
ފްރާންސިސް މަރުވިއިރު، އޭނާއަށް މާމަ ކިޔާ ތިން ކުދިންނާއި، މުނިމާމަ ކިޔާ ފަސް ކުދިންގެ އިތުރުން، މުނިމުނި މާމަ ކިޔާ ހަތަރު ކުދިން ދުނިޔޭގައި ތިބިކަން ފާހަގަކުރެވެއެވެ.
