ކެންސަރަށް ޚާއްސަ ހޮސްޕިޓަލް އިމާރާތްކުރާނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ބިމުގައި ހުސްކޮށް އޮތް ސަރަޙައްދުގައި ކަމަށް މާލެ ސިޓީ ގްރޫޕް އޮފް ހޮސްޕިޓަލްސް އިން މިއަދު ހާމަކޮށްފިއެވެ.
މި އިމާރާތަކީ 25 ބުރީގެ އިމާރާތެއް ކަމަށްވެސް އެ ފަރާތުން ބުނެފައިވެއެވެ.
މާލެ ސަރަޙައްދުގައި ހިންގާ ސަރުކާރު ހޮސްޕިޓަލްތަކުގެ ޚިދުމަތް ރަނގަޅުކުރުމަށް ކުރަމުންދާ މަސައްކަތްތަކާ ގުޅޭގޮތުން މަޢުލޫމާތު ޙިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި މި މަޢުލޫމާތު ހާމަކުރެއްވީ މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ޙަލީމެވެ.
Advertisement
"ކެންސަރު ހޮސްޕިޓަލް އަޅާނީ އައިޖީއެމް ހޮސްޕިޓަލް ބިމުގައި މިހާރު ޕާކިން އޭރިއާ އޮތް ހުސް ބިމުގައި. އެއީ 25 ބުރީގެ އިމާރާތެއް." ޙަލީމް ވިދާޅުވިއެވެ.
މި މަޝްރޫޢުގެ ފުރަތަމަ މަރުހަލާގައި ހަދާ ޑިޒައިނާއި ކޮންސެޕްޓްގެ މަސައްކަތް މިހާރު ވަނީ ނިމިފައެވެ. އަދި 2024 ވަނަ އަހަރުގެ ބަޖެޓުގައި ޑީޓެއިލް ކުރެހުންތަކާއި ކޮންޓްރެކްޓްކުރަން ކުރަންޖެހޭ މަސައްކަތްތައް ކުރުމަށް ބަޖެޓު ހިމެނުމަށް ވަނީ ހަމަޖެހިފައެވެ. ހޮސްޕިޓަލްގެ އެނދުގެ އަދަދާއި ޚިދުމަތްތަކުގެ ތަފްސީލްތައް ހިއްސާކުރާނީ ޑީޓެއިލް ކުރެހުންތައް ނިމުމުންނެވެ.
ޙަލީމް ވިދާޅުވި ގޮތުގައި މާލޭ ސަރަޙައްދުގައި ސިއްޙީ ޚިދުމަތްތައް ފުޅާކުރުމުގައި މިވަގުތު އެންމެ ބޮޑު އަމާޒެއް އޮތީ އެނދު އިތުރުކުރުމަށެވެ. މިގޮތުން މި އަހަރު ނިމުމުގެ ކުރިން އިތުރު 172 އެނދު ޚިދުމަތަށް ގެނެވޭނެ ކަމަށް އޭނާ ވިދާޅުވިއެވެ.
ކެންސަރަށް ޚާއްސަ ހޮސްޕިޓަލެއް ރާއްޖޭގައި ޤާއިމުކުރަން ނިންމީ، އެ ޚިދުމަތްތައް ރާއްޖެއިން ބޭރުން ހޯދުމަށް މިހާރުވެސް ރައްޔިތުންނާ ސަރުކާރުން ބޮޑު ހޭދައެއް ކުރަމުންދާތީއެވެ. ސަރުކާރުގެ އަމާޒަކީ ކެންސަރު ހޮސްޕިޓަލްގެ މަސައްކަތް ނިންމާ މި ދައުރުތެރޭގައި ޚިދުމަތަށް ގެނައުމެވެ.
