ރާއްޖޭގެ ބޯޑަރު ހުރަސްކޮށް ޤަވާއިދާ ޚިލާފަށް ރާއްޖެއަށް އެތެރެވާން އުޅުނު 51 ބިދޭސީއަކު އަނބުރާ ފޮނުވާލާފައިވާކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވެއްޖެއެވެ. މިކަން ޝަމްޢާން ހާމަކުރެއްވީ އިއްޔެ ދާޚިލީ ވުޒާރާއިން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެގައެވެ.

ޝަމްޢާން ވިދާޅުވިގޮތުގައި، ރާއްޖޭގެ ބޯޑަރު ހުރަސްކޮށް ރާއްޖެއަށް އެތެރެވުމަށްޓަކައި ކައުންޓަރފީޓް ނުވަތަ ފޯޖް ޕާސްޕޯޓް ބޭނުންކޮށްގެން އެތެރެވުމަށް ގިނަ ބަޔަކު މަސައްކަތްކުރަމުންދާކަން ފާހަގަކުރެވިފައިވެއެވެ. މީގެ ތެރޭގައި ކައުންޓަރފީޓް އަދި ފޯޖް ޕާސްޕޯޓުގެ އިތުރުން، ޝަޚްސު އޮޅުވާލުމަށް ބޭނުންކުރާ ޑޮކިއުމަންޓްތަކާއި އޭގައި ޖަހާފައިވާ ވިސާތަކަކީވެސް ފޯޖްކޮށްފައިވާ ތަކެތިކަން ފާހަގަކުރެވިފައިވާކަމަށް އޭނާ ވިދާޅުވިއެވެ.

"މި އަހަރު 51 ބިދޭސީއެއް ވަނީ އަޅުގަނޑުމެންގެ ބޯޑަރުން ހިފަހައްޓާފައި. މީގެ ތެރޭގައި ކައުންޓަރފިޓް ޕާސްޕޯޓާއި ޝަޚްސު އޮޅުވާލަން މަސައްކަތްކުރާ ޑޮ ޑޮކިއުމަންޓާއި އޭގައި ޖަހާފައި ހުރި ވިސާތަކަކީ ފޯޖްކޮށްފައި ހުރި ވިސާތަކެއްކަން ވަނީ ފާހަގަކުރެވިފައި. އެގޮތުން 51 ބިދޭސީއެއް ވަނީ އަނބުރާ ފޮނުވާލެވިފަ," ޝަމްޢާން ވަޙީދު ވިދާޅުވިއެވެ.

މީގެއިތުރުން، ރާއްޖޭގައި ބޮޑުވެފައިވާ ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ދަށުން، ޤަވާއިދާ ޚިލާފަށް އުޅޭ ބިދޭސީންގެ ތެރެއިން 5000 މީހުން ފޮނުވާލަން މި އަހަރު އަމާޒު ހިފާފައިވާކަމަށް ޝަމްޢާން ވިދާޅުވިއެވެ. މިހާތަނަށް ޤަވާއިދާ ޚިލާފަށް އުޅޭ 4361 ބިދޭސީއެއް އަނބުރާ އެމީހުންގެ ޤައުމަށް ފޮނުވާލާފައިވާކަމަށްވެސް ޝަމްޢާން ވިދާޅުވިއެވެ.

މި ފޮނުވާލެވުނު މީހުންގެ ތެރޭގައި ޤަވާއިދާ ޚިލާފަށް އުޅުމުގެ ސަބަބުން އިމިގްރޭޝަންގެ ބެލުމުގެ ދަށަށް ގެންދެވުނު ފަރާތްތަކާއި، އަމިއްލައަށް ފުރަން ބޭނުންވެގެން އެކަމަށް އެދިގެން ފުރުވާލެވުނު ފަރާތްތަކުގެ އިތުރުން، އިމިގްރޭޝަނުން ނޯޓިސް ދިނުމަށްފަހު ފުރުވާލެވުނު ފަރާތްތައް ހިމެނެއެވެ.

ޤަވާޢިދާއި ޚިލާފަށް އުޅޭ ބިދޭސީން ބަލައި ފާސްކުރުމަށް ކުރިއަށް ގެންދާ ޚާއްޞަ ރެއިޑު އޮޕަރޭޝަންގައި އިއްޔެ ވެސް މާލެއިން 02 ތަނެއް ވަނީ ބަލައި ފާސްކޮށްފައިވާއިރު، ޤަވާޢިދާ ޚިލާފަށް އުޅެމުންދިޔަ 02 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައިކަން ފާހަގަ ކުރެވެއެވެ.