ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދިވެހި ޒުވާނުންގެ ދުވަހާ ގުޅިގެން، ޤައުމަށް ވަފާތެރި، ދީންވެރި ބައެއްގެ ގޮތުގައި ޒުވާނުންވުމަށް ގޮވާލައްވާފައެވެ. ރައިސް މިގޮތަށް ގޮވައިލެއްވީ ސޯޝަލް މީޑިއާގައި ކުރެއްވި ޕޯސްޓެއްގައެވެ.

ރައީސް މުޢިއްޒު ވިދާޅުވެފައިވަނީ ޒަމާނުގެ އާ ފިޔަވަޅުތަކުގެ މަތީގައި ހަލުވިކަމާއެކު ދިވެހި ޒުވާނުން ދަތުރުކުރަންޖެހޭ ކަމަށެވެ. އަދި ޒުވާނުންނަކީ ޤައުމާއި މުޖުތަމަޢާއި ޢާއިލާއަށް ވަފާތެރި، ދުޅަހެޔޮ، ޚުލްގުހެޔޮ، ދީންވެރި ބައެއްގެ ގޮތުގައިވުމަށް އެދިވަޑައިގަންނަވާ ކަމަށެވެ.

ކޮންމެ އަހަރެއްގެވެސް އޮކްޓޯބަރު މަހުގެ 22 ވަނަ ދުވަސް ފާހަގަކުރަނީ ދިވެހި ޒުވާނުންގެ ދުވަހުގެ ގޮތުގައެވެ. މި ދުވަސް ފާހަގަކުރަނީ ޤައުމުގެ ތަރައްޤީގައި ޒުވާނުންގެ ދައުރު ފާހަގަކޮށް، ޒުވާނުންނަށް ހިތްވަރުދިނުމުގެ ގޮތުންނެވެ.

ރާއްޖޭގެ އާބާދީގެ އެންމެ ބޮޑު އިންސައްތައެއް ހިއްސާކުރާ ބަޔަކީ ޒުވާނުންކަމަށް ފާހަގަކުރައްވައި، ޤައުމު ހިންގުމުގައި ޒުވާނުންގެ ބަސްބުނުމަކީ މުހިންމު ކަމެއްކަމަށް ރައީސް މުޢިއްޒު ވިދާޅުވެފައިވެއެވެ.

ޒުވާނުންގެ ކުރިއެރުވުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ. އޭގެ ތެރޭގައި "ދިވެހި ޒުވާނުންގެ ޤައުމީ ލަފާދޭ ކޮމިޓީ" އުފެއްދެވުމާއި، ޒުވާނުންނަށް ޚާއްސަ ވުޒާރާއެއް އުފެއްދެވުން ހިމެނެއެވެ. މީގެ އިތުރުން، ތަޢުލީމީ ފުރުޞަތުތަކާއި ވަޒީފާއާއި ވިޔަފާރީގެ ފުރުޞަތުތައް ޒުވާނުންނަށް އަމާޒުކޮށް އިތުރުކުރުމުގެ މަސައްކަތްތައްވެސް ކުރިއަށްދާކަމަށް ސަރުކާރުން ބުނެއެވެ.