ހައްދުފަހަނައެޅި އިސްރާއީލުގެ ޔަހޫދީންގެ ފަރާތުން ފަލަސްޠީނު ރައްޔިތުންނަށް މިހާރު ދިމާވެފައިވާ ބޮޑު މުޞީބާތުގައި މިދިޔަ އަހަރު އޮކްޓޯބަރުން ފެށިގެން ހުޅަނގުއައްސޭރީން 759 މީހުން ޝަހީދު ކޮށްލައިފި ކަމަށް ހުޅަނގުއައްސޭރީން ރިޕޯޓް ކޮށްފިއެވެ.
ކުރިން، ހުޅަނގު އައްސޭރިއަކީ އިސްރާއީލުން ރައްކާތެރިވާނެ ތަނެއް ކަމަށް ބުނެފައިވާ ސަރަޙައްދެއް ނަމަވެސް މިހާރު އެތަނުގައި އިސްރާއީލުން ދަނީ ފަލަސްޠީނު މީހުންނަށް އަމާޒުކޮށް އޮޕަރޭޝަންތައް ހިންގައި މުސްލިމުން ޝަހީދުކުރަމުންނެވެ.
ފަލަސްތީނުގެ ހެލްތު މިނިސްޓްރީން މިއަދު ހާމަކުރި ގޮތުގައި 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހު އިސްރާއީލުގެ އަނިޔާވެރިކަން ފެށުނު ފަހުން ގުދުސް ހިމެނޭ ގޮތަށް ހުޅަނގު އައްސޭރީގައި އިސްރާއީލުގެ ސިފައިންނާއި އިސްތިއުމާރީން ޝަހީދުކޮށްލި ފަލަސްތީނުގެ މީހުންގެ އަދަދު 759 އަށް އަރާފައިވާއިރު، ހުކުރު ދުވަހު މިނިސްޓްރީން ނެރުނު ކުރު ބަޔާނެއްގައި ފާހަގަކޮށްފައިވާ ގޮތުގައި ޝަހީދު ވެފައިވާ މީހުންގެ ތެރޭގައި 165 ކުޑަކުދިންނާއި 18 އަންހެނުން ހިމެނެއެވެ. ހަމަ އެ މުއްދަތުގައި ރެކޯޑްކުރެވިފައިވާ 6،500 އަށް ވުރެ ގިނަ ޒަޚަމް ވެފައިވާ މީހުން ހިމެނެއެވެ.
Advertisement
މީގެ އިތުރުން އިސްރާއީލުގެ އިސްތިއުމާރީ ބާރުތަކުން ޣައްޒާއަށް ދޭ ޙަމަލާތައް ކުރިއަށްދާއިރު، އޭގެ ސަބަބުން 42،519 މީހުން ޝަހީދުންގެ ގޮތުގައި ޑޮކިއުމެންޓު ކުރެވިފައިވެއެވެ. އަދި 99،637 މީހުން ޒަޚަމްވެފައިވާއިރު، އޭގެ ތެރެއިން ވެސް ގިނައީ އަންހެނުންނާއި ކުޑަކުދިން ކަމަށް އދ އިން މީގެ ކުރިން ވަނީ ބުނެފައެވެ.
އަދިވެސް ވެއްޓިފައިވާ ޢިމާރާތްތަކުގެ ދަށުގައި ނުވަތަ މަގުމަތީގައިވާ ކުނިބުނިތަކުގެ ދަށުގައި ތާށިވެފައި ތިބި އެތައް ހާސް ބަޔަކު ނުވަތަ ހަށިގަނޑުތައް ތިބި ކަމަށާއި އެމީހުން ސަލާމަތް ކުރުމަށް ރެސްކިއު ޓީމުތަކަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ވެސް ހެލްތު މިނިސްޓްރީން ބުނެއެވެ.
އިސްރާއީލުން ފަލަސްޠީނަށް ހަމަލާތައް ދެމުން މިދަނީ މުޅި ފަލަސްޠީނުގެ އަސްލު ނަސްލު ނައްތާލުމުގެ މަޤުޞަދުގައެވެ.
