އަންނަ އަހަރު ތެލެސީމިއާ ބޯންމެރޯ ޓްރާންސްޕްލާންޓް ހަދާ ކުދިން ސްކްރީން ކުރަން ފަށާފައިވާ ކަމަށް ތެލެސީމިއާ މާސްޓަރ ޕްލޭން އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، ސިއްހަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
ވަޒީރު ވިދާޅުވި ގޮތުގައި ވޭތުވެދިޔަ 10 މަސްދުވަހުގެ ތެރޭގައި ތެލެސީމިއާގެ ކަންތައްތަކަށް ސަރުކާރުން ނުހަނު ގިނަގުނަ މަސައްކަތްތަކެއް ކޮށްފައިވެއެވެ. މީގެ ތެރޭގައި ސްކޫލު ކުދިން ބައްޔަށް ހޭލުންތެރިކުރުމާއި، އެ ކުދިން ބައްޔަށް ސްކްރީން ކުރުމުގެ މަސައްކަތް ހިމެނެއެވެ. އަދި ހަތަރު ތަނެއްގައި ލޭ ފޯރުކޮށްދޭ ބްލަޑް ބޭންކް ޤާއިމުކޮށްފައިވާ ކަމަށްވެސް ވަޒީރު ވިދާޅުވިއެވެ.
ބޯންމެރޯ ޓްރާންސްޕްލާންޓް ކުރުން މެދުކެނޑިފައި އޮތުމަށްފަހު، ރައީސްގެ ވައުދުފުޅާ އެއްގޮތަށް އަލުން އެ މަސައްކަތް މި އަހަރު ފަށާފައިވާ ކަމަށް ވަޒީރު ފާހަގަކުރެއްވިއެވެ. މިގޮތުން މިއަހަރު މިހާތަނަށް 14 ކުދިން ބޯންމެރޯ ހެދުމަށް ފޮނުވާފައިވާ ކަމަށް ވަޒީރު ވިދާޅުވިއެވެ.
Advertisement
ވުޒާރާއިން ދެއްވި މަޢުލޫމާތުގައިވާ ގޮތުން، މިވަގުތު ބޯންމެރޯ ހެދުމަށް ޝަރުތު ހަމަވާ 40 ކުދިން ލިސްޓްކުރެވިފައިވެއެވެ. މި ކުދިންނަކީ އާއިލާގެ ތެރެއިން ބޯންމެރޯ ޑޯނަރެއް ލިބިފައިވާ ކުދިންނެވެ.
ރާއްޖޭގައި ތެލަސީމިއާ ބަލިމީހުންގެ ގޮތުގައި 943 މީހަކު ދަފްތަރުކޮށްފައިވާއިރު، މިވަގުތު ދުނިޔޭގައި ތިބީ 655 ތެލަސީމިއާ މީހުންނާއި ކުދިންނެވެ.
ސިއްހަތާ ބެހޭ ވުޒާރާއިން ކުރިން ހާމަކޮށްފައިވާ ގޮތުގައި، ރާއްޖޭގައި ތެލެސީމިއާ ހޮސްޕިޓަލެއް އެޅުމުގެ މަސައްކަތް ކުރިއަށްދާ ކަމަށާއި، ހުޅުމާލޭ ދެވަނަ ފިޔަވަހީގައި އިމާރާތްކުރުމަށް ނިންމާފައިވާ ތެލެސީމިއާ ހޮސްޕިޓަލް އިމާރާތްކުރުމަށް ބޭނުންވާ 71,000 އަކަފޫޓުގެ ބިން މިހާރު ހަމަޖެހިފައިވެއެވެ. އަދި މަސައްކަތްތައް ވަރަށް އަވަހަށް ފަށާނެ ކަމަށްވެސް ވުޒާރާއިން ބުނެފައިވެއެވެ.
