ރާއްޖޭގެ ދެވަނައަށް އެންމެ ބޮޑު ސިޔާސީ ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ އަސާސީ ޤަވަޢިދަށް މުހިންމު އިޞްލާޙްތަކެއް ގެނެސްފިއެވެ. މި އިޞްލާޙްތައް ގެނެސްފައިވަނީ ޕާޓީ އުވާލަން ބޭނުންވާ ޙާލަތެއްގައި ޢަމަލުކުރާނެ ގޮތް ބަޔާންކުރާ މާއްދާތަކަށެވެ.
މިއަދު ބޭއްވުނު ކުއްލި ސެނެޓު ބައްދަލުވުމެއްގައި މި އިޞްލާޙްތައް ފާސްކޮށްފައިވާއިރު، އަސާސީ ޤަވަޢިދުގެ 9 ވަނަ ޗެޕްޓަރގެ ޕާޓީ އުވާލުމާ ގުޅޭ މާއްދާއަށް ތިން މައިގަނޑު އިޞްލާޙެއް ގެނެސްފައިވެއެވެ.
ކުރިން އަސާސީ ޤަވަޢިދުގައި އޮތީ ޕާޓީ ހިންގުމަށް ދަތިވާވަރަށް ޕާޓީގެ މާލީ ޙާލަތު ދަށްވެ، ޕާޓީގެ ލީޑަރޝިޕުން ޕާޓީގެ ސެނެޓަށް ހުށަހަޅާ އެކަން ދިރާސާ ކުރުމަށްފަހު ޕާޓީ އުވާލަން ޖެހޭކަމަށް ސެނެޓްގެ 3/4 ގެ އަޣްލަބިއްޔަތުން ފާސްކޮށްފިނަމަ ޕާޓީ އުވާލެވިދާނެ ކަމަށެވެ. އެހެންނަމަވެސް، މިހާރު ގެނެސްފައިވާ އިސްލާހުގެ ދަށުން ޕާޓީގެ ލީޑަރޝިޕަށް ފެންނަ ހާލަތެއްގައި 2/3 ގެ އަޣުލަބިއްޔަތުން ޕާޓީ އުވާލުމަށް ނިންމިދާނެއެވެ.
މި ބައްދަލުވުމުގައި ޓުރިޒަމް މިނިސްޓަރ އިބްރާހިމް ފައިސަލް، ޓްރާންސްޕޯޓު މިނިސްޓަރ މުހައްމަދު އަމީން، ޑިފެންސް މިނިސްޓަރ ޣައްސާން މައުމޫން އަދި އެހެނިހެން އިސް މެންބަރުން ބައިވެރިވެފައިވެއެވެ. އެހެންނަމަވެސް، ފިޝަރީޒް މިނިސްޓަރ އަހުމަދު ޝިޔާމް މި ބައްދަލުވުމުގައި ބައިވެރިވެފައެއް ނުވެއެވެ.
މީގެ އިތުރުން، މި ބައްދަލުވުމުގައި ޕާޓީގެ ނައިބު ރައީސްގެ މަޤާމަށް ފޮރިން މިނިސްޓަރ ޑރ. އަބްދުﷲ ޚަލީލް އަދި ޕާޓީގެ ސެކެރެޓަރީ ޖެނެރަލްގެ މަޤާމަށް އައިޖީއެމްއެޗްގެ ސީއީއޯ އަބްދުއްރައްޒާޤް ހަލީމް އައްޔަނު ކޮށްފައިވާކަން ޕާޓީން ހާމަކޮށްފައިވެއެވެ.
ޕީއެމް ސެނެޓުން މިއަދު ބޭއްވި ބައްދަލުވުން/ ފޮޓޯ: ޕީޕީއެމް
ޕީޕީއެމް އުވާލަން އުޅޭކަމުގެ އަޑުތައް ފެތުރެމުންދާއިރު، ޕާޓީން މިކަމާ ގުޅޭ ގޮތުން ރަސްމީކޮށް އެއްވެސް ބަޔާނެއް ދީފައެއް ނުވެއެވެ. އެހެންނަމަވެސް، މި އިޞްލާޙުތަކަކީ ޕާޓީ އުވާލުމަށް މަގުފަހިކުރާ ބަދަލުތަކެއްކަމަށް ބައެއް ފަރާތްތަކުން ދެކެއެވެ.
2011 ވަނަ އަހަރުގެ އޮކްޓޯބަރު މަހު ޕީޕީއެމް ރަޖިސްޓްރީ ކުރެވުނު އިރު، ޕާޓީގެ ލީޑަރޝިޕާ ޙަވާލުވެ ހުންނެވީ ކުރީގެ ރައީސް މައުމޫން ޢަބްދުލް ޤައްޔޫމެވެ. އޭގެ ފަހުން، 2013 ވަނަ އަހަރުގެ ރިޔާސީ އިންތިޚާބުގައި ޕާޓީގެ ރިޔާސީ ކެންޑިޑޭޓެއްގެ ގޮތުގައި ރައީސް ޢަބްދުﷲ ޔާމީޢަ އަބްދުލްޤައްޔޫމް ވާދަކުރައްވައި ވެރިކަމާއި ޙަވާލުވެވަޑައިގަތެވެ.
ނަމަވެސް، ޕާޓީގެ އެތެރޭގައި ޖެހުނު މައްސަލަތަކާ ގުޅިގެން ރައީސް ޔާމީން ޕީޕީއެމްގެ ބާރުތައް އަތުލެއްވިއެވެ. 2018ވަނަ އަހަރު ވެރިކަން ގެއްލުމާއި ގުޅިގެން، ރައީސް ޔާމީން ޕްރޮގްރެސިވް ނޭޝަނަލް ކޮންގްރެސް (ޕީއެންސީ) އުފެއްދެވިއެވެ. މިކަން ކުރެއްވީ ރައީސް މައުމޫނަށް ޕީޕީއެމް ލިބިވަޑައިގަތުމުގެ ފުރުޞަތު އޮތް ކަމަށް ޔާމީނަށް ޤަބޫލުފުޅު ކުރެއްވޭތީއެވެ.
2023 ވަނަ އަހަރުގެ ރިޔާސީ އިންތިޚާބުގައި ރައީސް ޔާމީނަށް ޕީޕީއެމްގެ ޓިކެޓުގައި ވާދަނުކުރެވުމުން، ޑރ. މުޙައްމަދު މުޢިއްޒު ޕީއެންސީގެ ޓިކެޓުގައި ވާދަކުރެއްވިއެވެ.
