ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ހުޅުމާލޭގައި ތަރައްޤީކުރާ ތެލެސީމިއާ ހޮސްޕިޓަލް ބިނާކުރުމުގެ އެއްބަސްވުމުގައި މިއަދު ސޮއިކޮށްފިއެވެ.
ތެލެސީމިއާ ޕްރިވެންޝަން އެންޑް ކޮންޓްރޯލް މެނޭޖްމަންޓް މާސްޓަރ ޕްލޭން އިފްތިތާހް ކުރުމަށް ކްރޮސް ރޯޑްސް މޯލްޑިވްސްގައި ބޭއްވުނު ރަސްމިއްޔާތުގައި މި އެއްބަސްވުމުގައި ސޮއިކުރެއްވީ ސިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް އާއި މެލޭޝިއާގެ މެޑޯ އޭޝިއާ ކުންފުނީގެ ސީއީއޯ އަދި މެނޭޖިންގ ޑިރެކްޓަރ ސްޓުއާޓް ޖޭ ވެނަރ ޕެކް އާއި ޗިން ހިން އިންޖީނިއަރިން ގްރޫޕްގެ ސީއީއޯ ރޮޖަރ ލިމް ސްވީކިއެޓްއެވެ. އަދި ސައިނޯމާ އިންޖީނިއަރިންގ އިންޑަސްޓްރީގެ މެނޭޖިންގ ޑިރެކްޓަރު ލިއު ޓާއޯއެވެ.
ހުޅުމާލެ ދެވަނަ ފިޔަވަހިން 72,000 އަކަފޫޓުގެ ބިމެއްގައި ތަރައްޤީކުރާ މި ހޮސްޕިޓަލަކީ އެންމެ ޒަމާނީ ވަސީލަތްތަކާއެކު ތެލަސީމިއާ ކުދިންނަށް ބޭނުންވާ ފަރުވާތައް ދެވޭގޮތަށް ފަރުމާކޮށްފައިވާ ހޮސްޕިޓަލެކެވެ. މީގެ ތެރޭގައި ލެބޯޓްރީއާއި ވޯޑްތަކުގެ އިތުރުން ޕްރައިވެޓް ރޫމްތަކާއި އައިސީޔޫ އަދި އެކަހެރިކޮށްގެން ފަރުވާދެވޭނެ އިންތިޒާމާއި،
Advertisement
ތެލެސީމިއާ ހޮސްޕިޓަލް އެޅުމަށް 100 މިލިއަން ރުފިޔާގެ އެހީއެއް ދިނުމަށް އުރީދޫއާއެކު ސަރުކާރުން ވަނީ މަޝްވަރާ ކުރައްވާފައެވެ. އަދި ތެލެސީމިއާއަށް ހޭލުންތެރި ކުރުމުގެ ޤައުމީ ކެމްޕޭނެއްވެސް މި މަހު ސަރުކާރުން ވަނީ ފަށައިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ އަންނަ އަހަރުން ފެށިގެން ތެލެސީމިއާ ކުދިންނަށް ސަރުކާރުން އިނާޔަތެއް ދެއްވަން ފައްޓަވާނެ ކަމަށެވެ. މި ހޮސްޕިޓަލް ތަރައްޤީކުރުމަކީ ތެލަސީމިއާ ކުދިންނަށް ޚިދުމަތް ދިނުމަށް ރައީސުލްޖުމްހޫރިއްޔާގެ މުހިންމު ތަޞައްވުރެއް ޙަޤީޤަތަކަށް ހެދުމުގެ މުހިންމު ފިޔަވަޅެކެވެ.
މި ހޮސްޕިޓަލް އެޅުމަކީ ރާއްޖޭގައި ތެލަސީމިއާ ކުދިންނަށް ޚާއްޞަ ފުރިހަމަ ޚިދުމަތްތަކެއް ފޯރުކޮށްދިނުމަށް އެޅޭ އެންމެ މުހިންމު ފިޔަވަޅު ކަމުގައި ބެލެވެއެވެ. މިހާރު ތެލަސީމިއާ ކުދިންނަށް ފަރުވާ ދެމުން އަންނަނީ އާންމު ހޮސްޕިޓަލްތަކުގެ ވަކި ސެކްޝަންތަކުން ކަމަށްވާއިރު، މި އައު ހޮސްޕިޓަލް ހުޅުވުމުން ތެލަސީމިއާ ކުދިންނަށް ބޭނުންވާ ހުރިހާ ޚިދުމަތްތަކެއް އެއް ތަނަކުން ލިބިގެންދާނެއެވެ.
ސަރުކާރުގެ މި މަސައްކަތަކީ ތެލަސީމިއާ ކުދިންނާއި އެ ކުދިންގެ ޢާއިލާތަކަށް ލުޔެއް ލިބިގެންދާނެ ކަމެއްގެ ގޮތުގައި ޞިއްޙީ ދާއިރާގެ މާހިރުން ފާހަގަކުރެއެވެ. އަދި މި ހޮސްޕިޓަލް ހުޅުވުމުން ރާއްޖޭގައި ތެލަސީމިއާގެ ފަރުވާ އިތުރަށް ހަރުދަނާވެ، ބައިނަލްއަޤްވާމީ ފެންވަރަށް ކުރިއަރައިގެންދާނެ ކަމަށް އުންމީދު ކުރެވެއެވެ.
