އިއްޔެ، އޮކްޓޯބަރު 14، 2024 ގައި ރައީސް ޑރ. މުޙައްމަދު މުޢިއްޒު ވަނީ ޑިސެމްބަރު 15، 2024 އިން ފެށިގެން ވޭޕް ނުވަތަ އިލެކްޓުރޯނިކް ސިގިރޭޓް އެތެރެކުރުމާއި، މިއަހަރުގެ 15 ޑިސެމްބަރުން ފެށިގެން ވިއްކުމާއި، ބޭނުންކުރުމާއި ގެންގުޅުން އަދި ބެހުމާއި ރާއްޖޭގައި އިޝްތިހާރުކުރުން ވެސް މަނާކޮށް ޢާންމު ޞިއްޙަތު ރައްކާތެރިކުރުމަށް މުހިންމު ފިޔަވަޅެއް އަޅުއްވާފައިވާކަން އިޢުލާންކުރައްވާފައެވެ. ވޭޕްގެ ނުރައްކާތެރިކަމުން ރައްޔިތުން ރައްކާތެރިކުރުމަށް އަޅުއްވާ ފިޔަވަޅެއްގެ ގޮތުންނެވެ. އިލެކްޓްރޯނިކް ދުންފަތުގެ އިސްތިއުމާލުކުރާ އާލާތްތަކުގެ ސަބަބުން ކުރާ ގެއްލުންތަކާއި ގުޅޭ ގޮތުން ޚާއްޞަކޮށް ޒުވާނުންގެ މެދުގައި ޞިއްޙީ ކަންބޮޑުވުންތައް އިތުރުވަމުންދާތީ އެވެ. ވޭޕުގެ ނަމުގައި މަސްތުވާތަކެތި ބޭނުންކޮށް އޭގެ ވިޔަފާރި ކުރާތީއެވެ.

ރައީސް ވިދާޅުވެފައިވަނީ، ފާއިތުވެދިޔަ އަހަރުތަކުގައި ވޭޕް ރެގިއުލޭޓް ކުރެވިފައިނުވާއިރު، މިކަމުގެ ސަބަބުން މީހުންނަށް ކުރިމަތިވަމުންދާ ސިއްހީ މައްސަލަތައް، ޚާއްޞަކޮށް ކުޑަކުދިންނަށް ކުރިމަތިވާ ސިއްހީ ނުރައްކާތަކުގެ ވާހަކަތައް ދައްކާތާ އަހަރުތަކެއް ވެފައިވާ ކަމަށެވެ. އަދި މަސްތުވާތަކެތީގެ ބާވަތްތައް ބޭނުންކުރުމަށް ވޭޕް ޑިވައިސްތައް ބޭނުންކުރުން އިތުރުވެ، އެކަމުގައި ކަންބޮޑުވުން ބޮޑުކަމަށެވެ.

ރައީސް ފާހަގަކުރެއްވި ގޮތުގައި ފާއިތުވި ފަސް އަހަރުގެ ތެރޭގައި ހަ ލައްކައަށް ވުރެ ގިނަ ވޭޕް އާލާތްތައް ރާއްޖެއަށް އެތެރެކޮށްފައިވެއެވެ. އަދި ވޭޕް ކޮންޓްރޯލް ކުރުމަކީ ވަރަށް ބޮޑު ގޮންޖެހުންތަކަކަށް ވެފައިވާއިރު، ޒުވާން ޖީލުތައް މިފަދަ ނުރައްކަލުގެ ޝިކާރައަކަށްވެ، އޯވަޑޯޒް ކޭސްތައް އިތުރުވަމުންދާތީ އެ ކަންބޮޑުވުން ރައީސުލްޖުމްހޫރިއްޔާ ފާހަގަކުރެއްވިއެވެ.

ދުންފަތުގެ އިސްތިޢުމާލު ކުރުމަށްވުރެ ރައްކާތެރި އެއްޗެއްގެ ގޮތުގައި ކުރިން ބެލެވުނު ވޭޕް އަކީ ޙަޤީޤަތުގައި ޞިއްޙީ ގޮތުން ބޮޑެތި ނުރައްކާތަކެއް ކުރިމަތިވާ ކަމެއް ކަމަށް ދިރާސާތަކުން ދައްކަ އެވެ. އެހެންކަމުން، ރައީސް ޑރ. މުޙައްމަދު މުޢިއްޒު ދެއްވަނީ ޢާންމު ޞިއްހަތަކީ އެމަނިކުފާނުގެ ވެރިކަމުގައި އެންމެ އިސްކަމެއްދޭ ކަމެއް ކަމުގެ ސާފު މެސެޖެކެވެ. ސަރުކާރުގެ މި ނިންމުމަކީ ރައްޔިތުންނަށް، ޚާއްޞަކޮށް ޒުވާން ޖީލަށް ދުޅަހެޔޮ މާހައުލެއް ކަށަވަރުކޮށްދީ، ޤައުމުގެ މުސްތަޤްބަލު ޙިމާޔަތް ކުރުމަށް ކުރާ ވަޢުދު ދައްކުވައިދޭ ނިންމުމެކެވެ.

މިއީ މުޅި ދުނިޔެ ބަލައިގަންނަ ކަމެކެވެ. އިންޑިއާ، ސިންގަޕޫރު، ބްރެޒިލް، އަދި ހޮންކޮންގް ފަދަ ޤައުމުތަކުން ވަނީ މި ފިޔަވަޅު އަޅާފައެވެ. އެ ނުރައްކާތައް ދެނެގަނެފަ އެވެ. ޤައުމުތަކުން މަސައްކަތް ކުރަމުންދަނީ ނިކޮޓީން އެޑިކްޝަން މަދުކުރުމަށާއި، އާ ޖީލެއް ގެއްލުން ހުރި އުފެއްދުންތަކަށް ބަރޯސާވުން ހުއްޓުވުމަށެވެ.

މަސްތުވާތަކެތީގެ މައްސަލަ އިންތިހާއަށް ބޮޑު މި މުޖުތަމަޢުގައި، ރައީސް ޑރ. މުޙައްމަދު މުޢިއްޒުގެ މި ނިންމެވުމަކީ ދުނިޔޭގެ އެންމެ ރަނގަޅު އުޞޫލުތަކާއި ޞިއްޙީ މާހިރުންގެ ހެކިތަކުގެ މައްޗަށް ބިނާވެފައިވާ ނިންމެވުމެކެވެ. އެމަނިކުފާނުގެ ސަރުކާރުގެ މި ސިޔާސަތަކީ ކުރިއަށް އޮތް ޖީލުތަކަށް އެޅުއްވި ރައްކާތެރި ފިޔަވަޅެއްކަން ދެނެގަންނަންޖެހެއެވެ. ޝުކުރިއްޔާ ރައީސް ޑރ. މުޢިއްޒު!