އެޑިއުކޭޝަން މިނިސްޓްރީގެ އާ ވެބްސައިޓް މިއަދު އިފުތިތާހުކޮށްފިިއެވެ. މި ވެބްސައިޓް އިފުތިތާހުކޮށްދެއްވީ އެޑިއުކޭޝަން މިނިސްޓްރީގެ މިނިސްޓަރ ޑރ. އިސްމާޢީލް ޝަފީޢުއެވެ.
އެޑިއުކޭޝަން މިނިސްޓްރީން މަޢުލޫމާތު ދިންގޮތުގައި، މި ވެބްސައިޓަކީ މިނިސްޓްރީން 2012 ވަނަ އަހަރުން ފެށިގެން ބޭނުންކުރަމުން އައި ކުރީގެ ވެބްސައިޓް ރީޑިޒައިންކޮށް، ޒަމާނީ ފެންވަރަށް ތަރައްގީކޮށްފައިވާ ވެބްސައިޓެކެވެ. މި ވެބްސައިޓް މެދުވެރިކޮށް، މިނިސްޓްރީއިން ދެމުންގެންދާ ޚިދުމަތްތަކުގެ މަޢުލޫމާތު ފަސޭހަކަމާއެކު ފޯރުކޮށްދެވި، އޮންލައިން މުޢާމަލާތްތައް ފަސޭހަކަމާއެކު ކުރެވޭނެއެވެ. އަދި ސްކޫލުތަކާ ގުޅޭ ގިނަ މަޢުލޫމާތާއި ތަފާސްހިސާބު މި ވެބްސައިޓްގައި ހިމަނާފައިވާކަން ފާހަގަކޮށްފަވެއެވެ.
ވެބްސައިޓް އިފުތިތާހުކުރުމަށް ބޭއްވި ހަފްލާގައި ވާހަކަފުޅު ދައްކަވަމުން މިނިސްޓަރ ވިދާޅުވީ، މި ވެބްސައިޓަކީ ރައްޔިތުންނަށް ފަސޭހަކަމާއެކު މުހިންމު މަޢުލޫމާތުތަކެއް ލިބިގެންދާނެ ގޮތަށް ފަރުމާކޮށްފައިވާ ވެބްސައިޓެއް ކަމަށެވެ. މިނިސްޓްރީގެ ތާރީޚާއި ކުރިން ވަޒީރުކަން ކުރެއްވި ބޭފުޅުންގެ މަޢުލޫމާތުވެސް މި ވެބްސައިޓުން ފެންނަން ހުންނާނެކަން މިނިސްޓަރ ފާހަގަކުރެއްވިއެވެ.
Advertisement
މީގެއިތުރުން، ދިވެހިރާއްޖޭގެ ކޮންމެ ސްކޫލަކަށް ޚާއްޞަ ވެބް ޕޭޖެއް ފަރުމާކޮށްފައިވާކަމަށް މިނިސްޓްރީން ބުނެފައިވެއެވެ. މި ޕޭޖުތަކުގައި ސްކޫލުތައް އުފެދުނުގޮތާއި ތާރީޚުގެ އިތުރުން ދަރިވަރުންނާއި މުދައްރިސުންގެ އަދަދު ފަދަ މަޢުލޫމާތުތައް ހިމަނާފައިވާކަމަށް ބުނެފައިވެއެވެ. އަދި ތަޢުލީމީ ދާއިރާގެ މުހިންމު ބައެއް ތަފާސް ހިސާބުތަކާއި، މިނިސްޓްރީގެ މުހިންމު ޚަބަރުތައް ވެސް މި ވެބްސައިޓުން ފެންނަން ހުންނާނެކަމަށް މިނިސްޓްރީން ހާމަކުރިއެވެ.
މިނިސްޓަރ ބުނިގޮތުގައި ކުރިއަށް އޮތް ދުވަސްތަކުގައި މި ވެބްސައިޓް އިތުރަށް ތަރައްގީކޮށް، މަޢުލޫމާތު މުއްސަނދި ވެބްސައިޓަކަށް ހެދުމުގެ މަސައްކަތް ކުރިއަށްދާނެ ކަމަށެވެ. އަދި ސްކޫލުތަކުން ހިންގާ ޙަރަކާތްތައް މި ވެބްސައިޓް މެދުވެެދުވެރިކޮށް ފެންނަން ހުންނާނެ ގޮތް ހެދުމަކީވެސް މިނިސްޓްރީގެ އަމާޒެއް ކަމުގައި މިނިސްޓްރީން ބުންޏެވެ.
