ދުނިޔޭގެ ނަފްސާނީ ސިއްހަތުގެ ދުވަހާ ދިމާކޮށް، މުދައްރިސުންނަށް ޚާއްސަ ނަފްސާނީ އެހީގެ ހެލްޕްލައިނެއް މިއަދު ޤާއިމްކޮށްފިއެވެ. މިއީ ކުރިން ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށް ޤާއިމްކޮށްފައިވާ ހެލްޕްލައިން 1484 މުދައްރިސުންނަށް ވެސް ބޭނުންކުރެވޭނެ ގޮތަށް ފުޅާކުރުމަށް ކަމަށް ތަޢުލީމީ ވުޒާރާއިން ހާމަކުރިއެވެ.
މިއަދު ހެނދުނު މިނިސްޓްރީ އޮފް އެޑިޔުކޭޝަންގައި ބޭއްވުނު ޚާއްޞަ ޙަފްލާއެއްގައި މި ހެލްޕްލައިން އިފްތިތާޙްކޮށްދެއްވީ އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢުއެވެ. މި ހެލްޕްލައިން ޤާއިމްކޮށްފައިވަނީ ތަޢުލީމީ ވުޒާރާއިން އިސްނަގައިގެން، ޔުނިސެފާއި ދުނިޔޭގެ ސިއްޙަތު ޖަމްޢިއްޔާގެ އެހީތެރިކަމާއެކުގައެވެ.
އެގޮތުން. މި ހެލްޕްލައިންގެ މައިގަނޑު މަޤްޞަދަކީ ދަރިވަރުންނާއި މުދައްރިސުންނަށް ނަފްސާނީ ފުރަތަމަ އެހީ ފޯރުކޮށްދެވޭނެ ހަރުދަނާ ނިޒާމެއް ޤާއިމްކޮށް، އެހީތެރިކަން ބޭނުންވާ ފަރާތްތަކަށް އެކަށީގެންވާ ގޮތެއްގައި އެ ފުރުޞަތު ފަހިކޮށްދިނުން ކަމަށް ވުޒާރާއިން މައުލޫމާތު ދިނެވެ.
Advertisement
މީގެ އިތުރުން، މި ނިޒާމުގެ ތެރެއިން ދަރިވަރުންނާއި މުދައްރިސުންނަށް ދިމާވާ ކަންބޮޑުވުންތަކާ ގުޅިގެން ދިމާވެދާނެ ނަފްސާނީ ހާސްކަމަކުން އަރައިގަތުމަށް އެހީތެރިވުމާއި، ދަރިވަރުންނަށް އަވަސް އެހީތެރިކަން ފޯރުކޮށްދިނުމާއި، ސްކޫލް ކައުންސެލިންގ ޚިދުމަތް އިތުރަށް ހަރުދަނާކުރުން ހިމެނެކަމަށް ވުޒާރާއން ބުންޏެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ޑރ. އިސްމާޢީލް ޝަފީޢު ވިދާޅުވީ އެޑިޔުކޭޝަން މިނިސްޓްރީއިން ކުރާ ގިނަ މަސައްކަތްތަކުގައި މުދައްރިސުންގެ ދައުރު ވަރަށް މުހިންމު ކަމަށާއި، އެހެންކަމުން މުދައްރިސުންގެ ނަފްސާނީ ދުޅަހެޔޮކަމަކީ މިނިސްޓްރީއިން އިސްކަންދޭ ކަމެއް ކަމަށެވެ. އަދި މި ހެލްޕްލައިން މެދުވެރިކޮށް، މުދައްރިސުންގެ ކަންބޮޑުވުންތަކަށް ތަސައްލީއެއް ލިބޭނެ ކަމަށް އުންމީދުކުރައްވާ ކަމަށްވެސް މިނިސްޓަރ ވިދާޅުވިއެވެ.
މި ހެލްޕްލައިންގެ ޚިދުމަތް ލިބޭނީ ހުކުރު ދުވަސް ފިޔަވައި ކޮންމެ ދުވަހެއްގެ މެންދުރުފަހު 3:00 އިން ރޭގަނޑު 9:00 އާ ހަމައަށެވެ. މި ހެލްޕްލައިން މެދުވެރިކޮށް ދަރިވަރުންނާއި މުދައްރިސުންނަށް ނަފްސާނީ ފުރަތަމަ އެހީ ފޯރުކޮށްދޭނީ އެކަމަށް ޚާއްޞަކޮށް ތަމްރީނު ކުރެވިފައިވާ ސްކޫލްތަކުގެ ކައުންސެލަރުންނެވެ. މި ކައުންސެލަރުން ތަމްރީނު ކުރުމާއި ހެލްޕްލައިން ޚިދުމަތް ފޯރުކޮށްދޭނެ އުޞޫލުތައް އެކުލަވާލުމުގައި ދިވެހި ރެޑް ކްރެސެންޓުން ވަނީ ފަންނީ އެހީތެރިކަން ފޯރުކޮށްދީފައެވެ.
ތަޢުލީމީ ވުޒާރާއިން އިތުރަށް މަޢުލޫމާތު ދިންގޮތުގައި، މި ހެލްޕްލައިންގެ ޚިދުމަތް ތަޢާރަފުކުރުމާ ގުޅިގެން، ސްކޫލްތަކުގައި މުދައްރިސުންނަށް މި ޚިދުމަތާ ބެހޭ މަޢުލޫމާތު ދިނުމުގެ ސެޝަންތަކެއް ކުރިއަށް ގެންދިއުމަށް ވަނީ ރޭވިފައެވެ.
މި ހެލްޕްލައިން ޤާއިމްކުރުމަކީ ރާއްޖޭގެ ތަޢުލީމީ ނިޒާމު އިތުރަށް ހަރުދަނާކުރުމަށް އެޅޭ މުހިންމު ފިޔަވަޅަކަށް ވާއިރު، މުދައްރިސުންގެ ނަފްސާނީ ދުޅަހެޔޮކަން ކަށަވަރުކުރުމަކީ ދަރިވަރުންގެ ތަޢުލީމީ ކުރިއެރުމަށްވެސް އެޅޭ މުހިންމު ބިންގަލެއް ކަމުގައި ފާހަގަކުރެވެއެވެ.
