ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގައި އިއްޔެ އެންމެ ވައިގަދަވެފައިވަނީ ފުވައްމުލަކު ސިޓީއަށް ކަމަށް މޫސުމާ ބެހޭ ގައުމީ އިދާރާ (މެޓް) އިން ބުނެފިއެވެ.

މެޓް އޮފީހުން ވަނީ ފާއިތުވެދިޔަ 24 ގަޑިއިރުގައި އެކި ހިސާބުތަކަށް ވައިޖެހުނު މިންވަރު ރެކޯޑްކޮށް އެ ޢަދަދުތައް އާންމުކޮށްފައެވެ.

މެޓް އޮފީހުން އާންމުކުރި ތަފާސްހިސާބުތައް ދައްކާ ގޮތުން، ވިލާގަނޑުގައި ފުވައްމުލަކަށް ގަޑިއަކު 44 މޭލަށް ވައިގަދަވިއެވެ. ދެވަނައަށް އެންމެ ވައިގަދަވީ އދ. މާމިގިއްޔަށް ކަމަށްވާއިރު، އެ ރަށަށް ވިލާގަނޑުގައި 42 މޭލަށް ވަނީ ވައިގަދަވެފައެވެ. ތިންވަނައަށް އެންމެ ވައިގަދަވީ ބ. ދަރަވަންދޫއަށް ކަމަށްވާއިރު، އެ ރަށަށް ވިލާގަނޑުގައި 40 މޭލަށް ވަނީ ވައިގަދަވެފައެވެ.

މީގެ އިތުރުން، އެންމެ ވައިގަދަވިަދަވި ރަށްތަކުގެ ތެރޭގައި ހދ. ކުޅުދުއްފުށި (37 މޭލް)، ހދ. މަކުނުދޫ (38 މޭލް)، ހުޅުލެ (38 މޭލް) އަދި އއ. ތޮއްޑޫ (37 މޭލް) ހިމެނޭ ކަމަށް މެޓް އޮފީހުން ބުންޏެވެ.

މެޓް އޮފީހުން ފާހަގަކޮށްފައިވާ ގޮތުގައި، ރާއްޖެއަށް މިހާތަނަށް އެންމެ ވައިގަދަވި ކަމަށް ރެކޯޑު ކުރެވިފައިވަނީ 1991 ވަނަ އަހަރުގެ މެއި 29 ވަނަ ދުވަހުއެވެ. އެ ދުވަހު ސ. ގަމަށް ވިލާގަނޑުގައި ގަޑިއަކު 103.5 މޭލަށް ވަނީ ވައިގަދަވެފައެވެ.

ރާއްޖެއަށް މިދުވަސްވަރު ހުޅަނގު މޫސުމުގެ ވިއްސާރަ ކުރަމުންދާ އިރު، މިއަދު ވެސް ރާއްޖޭގެ ގިނަ ހިސާބުތަކަށް މޫސުން ގޯސްވެ، ވައިގަދަވެ ކަނޑުތައް ގަދަވާނެ ކަމަށް މެޓް އޮފީހުން ލަފާކޮށްފައިވެއެވެ. މިކަމާ ގުޅިގެން ދަތުރުފަތުރު ކުރާ ފަރާތްތަކަށް ސަމާލުވުމަށް އެ އޮފީހުން ވަނީ އިރުޝާދު ދީފައެވެ.