ސްކޫލް ބަންދަށް ފަހު ދެވަނަ ޓާމުގެ ކިޔެވުން މިއަދު ފަށައިފިއެވެ.
ސްކޫލްތަކުގެ މަސައްކަތް ނިންމާ ޗުއްޓީއަށް ދިޔުމަށް ފުރަތަމަ ޓާމުގެ ރިޕޯޓު ފޮތް ދީފައިވަނީ މިދިޔަ ސެޕްޓެމްބަރު މަހުގައެވެ.
ދިރާސީ އަހަރުގެ ދެވަނަ ޓާމުގެ ކިޔެވުން ނިމި، ދަރިވަރުން ބޮޑު ޗުއްޓީއަށް ދާނީ އަންނަ އަހަރުގެ މާޗް 6 ގައެވެ.
Advertisement
އެޑިއުކޭޝަން މިނިސްޓްރީން މަޢުލޫމާތު ދީފައިވާ ގޮތުގައި ނިމުނު ފުރަތަމަ ޓާމުގައި 96,000 ދަރިވަރުން ވަނީ ތަޢުލީމު ޙާޞިލްކޮށްފައެވެ. އޭގެ ތެރޭގައި ހިމެނެނީ 40,300 އަންހެން ދަރިވަރުންނާއި 42,700 ފިރިހެން ދަރިވަރުންނެވެ. އޭގެ ތެރެއިން 17,000 ދަރިވަރުންނަކީ މާލެ ސަރަޙައްދުގައި ތަޢުލީމް ޙާޞިލް ކުރަމުން އަންނަ ދަރިވަރުން ކަމަށް މިނިސްޓްރީން ވަނީ މީގެ ކުރިން ބުނެފައެވެ.
މީގެ އިތުރުން އަމިއްލަ މަދަރުސާތަކުގައި 13,000 އަށް ވުރެ ގިނަ ދަރިވަރުން ތަޢުލީމް ހާޞިލް ކުރިއިރު އޭގެ ތެރެއިންވެސް ގާތްގަނޑަކަށް 9,000 ދަރިވަރުން ތަޢުލީމް ޙާޞިލްކޮށްފައިވަނީ މާލެ ސަރަޙައްދުގައި ކަމަށް މިނިސްޓްރީން ބުންޏެވެ.
ފުރަތަމަ ޓާމުގެ ކިޔެވުން ފެށުނު އިރު ރާއްޖޭގެ ސްކޫލްތަކުގައި 12,662 މުދައްރިސުން ކިޔަވައިދޭނެ ކަމަށް މިނިސްޓްެރީން ބުނެފައިވާއިރު އޭގެ ތެރޭގައިވެސް ގިނައީ ދިވެހި މުދައްރިސުންކަން ފާހަގަކޮށްލެވެއެވެ. އެގޮތުން 10,729 ދިވެހި މުދައްރިސުން ފުރަތަމަ ޓާމުގައި ކިޔަވައިދީފައިވާއިރު ބިދޭސީ މުދައްރިސުންގެ ޢަދަދަކީ 1,933 ކަމަށް މިނިސްޓްރީން ބުންޏެވެ.
ސަރުކާރު ގިނަ ސްކޫލްތަކުގައި ފުރަތަމަ ޓާމު ކިޔަވައިދީފައިވަނީ އެއް ދަންފަޅިއަށެވެ. އެގޮތުން 162 ސަރުކާރު ސްކޫލެއްގައި އެއް ދަންފަޅިއަށް ކިޔަވައިދީފައިވާއިރު 55 ސްކޫލެއްގައި ކިޔަވައިދީފައިވަނީ ދެ ދަންފަޅިއަށެވެ.
އަންނަ އަހަރުތަކުގައި ތަޢުލީމީ ދާއިރާއަށް އިތުރު ބަދަލުތަކެއް ގެނައުމަށް ސަރުކާރުން ނިންމާފައިވާއިރު، އެގޮތުން ގެންނަ އެންމެ ބޮޑު ބަދަލެއްގެ ގޮތުގައި ފާހަގަކުރެވެނީ 2026 ވަނަ އަހަރުން ފެށިގެން ދިރާސީ އަހަރު ފެށުން ޖެނުއަރީ މަހަށް ބަދަލުކުރުމާއި، 2024 ވަނަ އަހަރުގެ ޑިސެންބަރު މަހުން ފެށިގެން ބޮޑު ޗުއްޓީ ޑިސެންބަރު މަހުގައި ދިނުމަށް ނިންމުމެވެ.
މި ބަދަލުތަކުގެ ސަބަބުން ދިވެހިރާއްޖޭގެ ތަޢުލީމީ ނިޒާމު އިތުރަށް ހަރުދަނާކޮށް، ދަރިވަރުންނަށް މަންފާކުރަނިވި ގޮތެއްގައި ތަޢުލީމު ފޯރުކޮށްދިނުމަށް މަގުފަހިވެގެންދާނެ ކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
