ކަޒަކިސްތާނުގެ އަސްތާނާގައި ބާއްވާ 27 ވަނަ އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އޭޝިއަން ޗެމްޕިއަންޝިޕް މާދަމާއިން ފެށިގެން މިމަހުގެ 13 ވަނަ ދުވަހުގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފައެވެ. އަންނަ އަހަރުގެ ވޯލްޑް ޓޭބަލް ޓެނިސް ޗެމްޕިއަންޝިޕްގެ ކޮލިފިކޭޝަން މުބާރާތެއްގެ ގޮތުގައި ހިންގާ މި އިވެންޓުގައި ރާއްޖޭގެ ގައުމީ ޓޭބަލް ޓެނިސް ޓީމުގެ އަށް ކުޅުންތެރިން ވާދަކުރާނެ އެވެ.
އަންހެން ސްކޮޑުގައި ހިމެނެނީ ފާތިމަތު ދީމާ އަލީ، އައިޝަތު ރަފާ ނާޒިމް، މިޝްކާ މުހައްމަދު އިބްރާހިމް، އަދި ލައިސާ ފަތުހުﷲ އިސްމާއީލެވެ. ފިރިހެން ސްކޮޑް ތަމްސީލު ކުރަނީ އެންމެ ފަހުގެ ގައުމީ ޗެމްޕިއަން އަހްޔާރު އަހުމަދު ޚާލިދާއި، ތަޖުރިބާކާރު ކުޅުންތެރިޔާ މުންސިފް އަހުމަދާއި، މުހައްމަދު ޝަފާން އިސްމާއިލް، އަދި ޒީކް ހަސަން ލަތީފެވެ.
މިއަހަރުގެ މުބާރާތުގައި އަސްތާނާގައި ހުންނަ ސްޓޭޓް ސްޕޯޓްސް ކޮމްޕްލެކްސްގައި ކޮލިފައިން އަށް ވާދަކުރާނީ ފިރިހެން 24 ޓީމަކާއި އަންހެން 20 ޓީމެކެވެ. ރާއްޖެއަށް މި މުބާރާތަކީ ބައިނަލްއަޤްވާމީ އެކްސްޕޯޝަރ އާއި އަންނަ އަހަރުގެ ވޯލްޑް ޗެމްޕިއަންޝިޕްތަކުން ޖާގަ ކަށަވަރުކުރުމުގެ ފުރުޞަތެއް ލިބިގެންދާނެ މުހިންމު ފުރުޞަތެކެވެ.
