މިއަދު ފާހަގަކުރާ ބައިނަލްއަޤްވާމީ މުދައްރިސުންގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރާއްޖޭގެ އެންމެހާ މުދައްރިސުންނަށް ހެޔޮއެދުމާއި ތަހުނިޔާ ފޮނުއްވައިފިއެވެ.

ރައީސް މި ތަހުނިޔާ ފޮނުއްވާފައިވަނީ އެމަނިކުފާނުގެ ސޯޝަލް މީޑިއާ ޕްލެޓްފޯމްތަކުގައި ޕޯސްޓެއް ޝާއިޢުކުރައްވައިގެންނެވެ. މި ޕޯސްޓުގައި ރައީސް ވަނީ މުދައްރިސުންގެ މަތިވެރި މަޤާމާއި އެބޭފުޅުންގެ މުހިންމުކަން ފާހަގަކުރައްވާފައެވެ.

ރައީސް މުޢިއްޒުގެ ޕޯސްޓުގައި ވިދާޅުވެފައިވަނީ "މުދައްރިސުންނަކީ އެތައް ބައެއްގެ ހަޔާތް އަލިކޮށްދޭ ދަންމަރެކެވެ. އެބޭފުޅުންނަކީ އުށްބަތިތަކެއް ފަދައިން، އެހެން މީހުންނަށް އަލިކުރުމަށްޓަކައި އެތައް ހާސް ބައްތިއެއް ދިއްލާލަދެއްވާ ބައެކެވެ. އެކަން ކޮށްދެނީ ކޮންމެ މީހަކު އެ އަލިކަމުގެތެރޭން އަމިއްލައަށް ކުރިއަށް ދިޔުމަށްޓަކައެވެ."

ކޮންމެ އަހަރެއްގެ އޮކްޓޫބަރު 5 ވަނަ ދުވަހަކީ ބައިނަލްއަޤްވާމީ މުދައްރިސުންގެ ދުވަހެވެ. މިއަހަރު މި ދުވަސް ފާހަގަކުރުމަށް ޔުނެސްކޯއިން ކަނޑައަޅާފައިވާ ޝިޢާރަކީ "ވެލުއިން ޓީޗާރސް ވޮއިސެސް: ޓުވާޑްސް އަ ނިއު ސޯޝަލް ކޮންޓްރެކްޓް ފޯ އެޑިއުކޭޝަން" އެވެ. މި ޝިޢާރުގެ މަޤްޞަދަކީ ތަޢުލީމީ ސިޔާސަތުތައް ކަނޑައެޅުމުގައި މުދައްރިސުންގެ އަޑު އިވޭކަން ކަށަވަރުކުރުމެވެ.

ރައީސް މުޢިއްޒުގެ މި ތަހުނިޔާއިން، މުދައްރިސުންގެ މަސައްކަތުގެ އަގު ވަޒަންކުރައްވާ، އެބޭފުޅުންގެ ދައުރު ފާހަގަކުރައްވާފައިވާކަން ފާހަގަކުރެވެއެވެ.