އިސެސްކޯ އެޑިއުކޭޝަން މިނިސްޓަރުންގެ މަހާސިންތާގައި ރާއްހެ ބައިވެރިވެއްޖެ

އިސްލާމިކް ވާރލްޑް އެޑިއުކޭޝަނަލް، ސައިންޓިފިކް، އެންޑް ކަލްޗަރަލް އޯގަނައިޒޭޝަން (އިސެސްކޯ)ގެ 3 ވަނަ އެޑިއުކޭޝަން މިނިސްޓަރުންގެ މަހާސިންތާގައި ދިވެހިރާއްޖޭގެ ތަޢުލީމާބެހޭ ވަޒީރު ޑރ. އިސްމާޢީލް ޝަފީޢު ބައިވެރިވެވަޑައިގެންފިއެވެ.

އޮމާނުގެ ވެރިރަށް މަސްކަޓްގައި ކުރިއަށްދާ މި މަހާސިންތާއަކީ އިސްލާމީ ޤައުމުތަކުގެ މެދުގައި އުފައްދާފައިވާ ބައިނަލްއަޤްވާމީ ޖަމްޢިއްޔާ، އިސެސްކޯއިން އިންތިޒާމުކޮށްގެން ބާއްވާ ބައްދަލުވުމެކެވެ.

މި މަހާސިންތާގައި ޢަރަބި އިސްލާމީ ޤައުމުތަކުގެ ތަޢުލީމީ ދާއިރާގެ އިސްވެރިން ބައިވެރިވެވަޑައިގަންނަވައެވެ. މި އަހަރުގެ މަހާސިންތާގެ ޝިޢާރަކީ "ބިޔޯންޑް ޓްރާންސްފޯމިންގ އެޑިޔުކޭޝަން ސަމިޓް: ފްރޮމް ކޮމިޓްމަންޓް ޓު އެކްޝަން" އެވެ. މި ޝިޢާރުގެ ދަށުން، އިސްލާމީ ދުނިޔޭގައި ތަޢުލީމު ދިނުމާއި، ތިމާވެއްޓާ ރައްޓެހި ގޮތަކަށް ތަޢުލީމު ފޯރުކޮށްދިނުމާއި، އާޓިފިޝަލް އިންޓެލިޖެންސްގެ ދައުރު އަދި ޑިޖިޓަލް ޓްރާންސްފޮމޭޝަން އޮފް އެޑިއުކޭޝަނާއި، އެކި ކުއްލި ޙާލަތްތަކުގައި ތަޢުލީމު ފޯރުކޮށްދިނުމާ ގުޅޭގޮތުން މަޝްވަރާކުރެވޭނެއެވެ.

މި މަހާސިންތާގެ އަމާޒަކީ ތަޢުލީމު ބަދަލުކުރުމަށް ޤައުމުތަކަށް ބާރުއެޅުމާއި، ޓްރާންސްފޯމިންގ އެޑިޔުކޭޝަން ސަމިޓުގެ ނިންމުންތައް ތަންފީޒުކުރުމުގައި ޤައުމުތަކުގެ މެދުގައި ގުޅުން ބަދަހިކުރުމެވެ.

މިއަދުގެ ސެޝަންގައި މި މަހާސިންތާގެ ޝިޢާރާ ގުޅޭ ގޮތުން އެކި ޤައުމުތަކުން ސްޓޭޓްމަންޓްތައް ހުށަހެޅުން ކުރިއަށްދާނެއެވެ. އެގޮތުން ދިވެހިރާއްޖޭގެ ފަރާތުން ސްޓޭޓްމަންޓް ހުށަހަޅުއްވާނީ ވަޒީރު ޑރ. އިސްމާޢީލް ޝަފީޢުއެވެ.

މި މަހާސިންތާގައި ބައިވެރިވުމުގެ ސަބަބުން، ދިވެހިރާއްޖެއަށް އިސްލާމީ ޤައުމުތަކުގެ ތަޢުލީމީ ދާއިރާގެ އިސްވެރިންނާ ގުޅުން ބަދަހިކޮށް، ތަޖުރިބާ ޙިއްސާކުރުމުގެ ފުރުސަތު ލިބިގެންދާނެއެވެ. އަދި ތަޢުލީމީ ދާއިރާގައި ކުރިމަތިވެފައިވާ ގޮންޖެހުންތަކަށް ޙައްލު ހޯދުމަށް އެހެން ޤައުމުތަކާއެކު މަޝްވަރާކުރުމުގެ ފުރުސަތުވެސް ލިބިގެންދާނެއެވެ.

މީގެއިތުރުން، މި މަހާސިންތާގައި ޑިޖިޓަލް ޓެކްނޮލޮޖީ އަދި އާޓިފިޝަލް އިންޓެލިޖެންސް ފަދަ ޒަމާނީ ވަސީލަތްތައް ތަޢުލީމީ ދާއިރާގައި ބޭނުންކުރުމާ ގުޅޭގޮތުން މަޝްވަރާކުރެވޭނެކަމަށް ބެލެވެއެވެ. މިކަމަކީ ދިވެހިރާއްޖޭގެ ތަޢުލީމީ ދާއިރާ ތަރައްޤީކުރުމަށް މުހިންމު މަޢުލޫމާތުތަކެއް ލިބިގެންދާނެ ކަމެކެވެ.

އިސެސްކޯގެ މި މަހާސިންތާ 3 ދުވަހުގެ މުއްދަތަށް ކުރިއަށްދާނެއެވެ. މި މުއްދަތުގައި ތަޢުލީމީ ދާއިރާގެ ތަފާތު މައުޟޫޢުތަކާ ގުޅޭގޮތުން މަޝްވަރާކުރެވި، ބައިވެރިވާ ޤައުމުތަކުގެ މެދުގައި އެއްބާރުލުން އިތުރުކުރުމަށް މަސައްކަތްކުރެވޭނެއެވެ.