"މޯލްޑިވިއަން ސީޕްލޭން" ވިޔަފާރި އިތުރަށް ފުޅާކޮށް، ޒަމާނީކުރުމަށްޓަކައި ޖޮއިންޓް ވެންޗަރ ކުންފުންޏެއް އުފެއްދުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ނިންމަވައިފިކަން ރައީސް އޮފީހުން ނެރުނު ބަޔާނެއްގައި ހާމަކޮށްފިއެވެ.

ރައީސުލްޖުމްހޫރިއްޔާ މިގޮތަށް ނިންމެވީ ސެޕްޓެންބަރު 30 ވަނަ ދުވަހު ބޭއްވުނު ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ފިނޭންސުން ހުށަހެޅި ކަރުދާހަކާއި ގުޅޭގޮތުން މަޝްވަރާ ކުރެއްވުމަށް ފަހުގައެވެ. މި ނިންމުމުގެ ދަށުން، އައިލެންޑް އޭވިއޭޝަން ސަރވިސަސް ލިމިޓެޑް (އައި.އޭ.އެސް.އެލް) އާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އާ ދެމެދު ސްޓްރެޓީޖިކް ޕާޓްނަރޝިޕެއް ޤާއިމްކުރެވި، ޖޮއިންޓް ވެންޗަރ ކުންފުންޏެއް އުފެއްދޭނެއެވެ.

މި ޖޮއިންޓް ވެންޗަރ ކުންފުނި އުފެއްދުމުގެ މަސައްކަތް 2025 އެޕްރީލް 30 އަށް ނިންމުމަށް ވަނީ ނިންމާފައެވެ. އަދި މި ކުންފުނި އުފެއްދުމަށްޓަކައި ނިންމަންޖެހޭ ކަންކަން އިކޮނޮމިކް ކައުންސިލަށް ހުށަހަޅައިގެން ކުރިއަށް ގެންދިއުމަށް ވެސް ވަނީ ނިންމާފައެވެ.

މީގެއިތުރުން، ހަމަ މި ބައްދަލުވުމުގައި ރާއްޖޭގެ އިޤްތިޞާދު ސިންދަފާތުކޮށް ކަނޑުގެ ވަޞީލަތްތަކުން ލިބޭ ނަފާ އިތުރުކުރުމަށްޓަކައި ގިނަ ނިންމުންތަކެއް ނިންމާފައިވެއެވެ. މީގެ ތެރޭގައި ރާއްޖޭގެ ހަތަރު އަތޮޅެއްގައި މެރިކަލްޗަރ ޒޯންތަކެއް ޤާއިމުކުރުމާއި، މާލެ އަތޮޅު ދެކުނުގައި ފާނަ އާލާކުރުމަށް ޚާއްޞަ ސަރަޙައްދެއް ކަނޑައެޅުން ހިމެނެއެވެ.

މި ނިންމުންތަކުގެ ސަބަބުން ރާއްޖޭގެ ސީޕްލޭން ޚިދުމަތް އިތުރަށް ފުޅާވެ، ކަނޑުގެ ވަސީލަތްތަކުން ލިބޭ އާމްދަނީ އިތުރުވެ، އިޤްތިޞާދީ ގޮތުން ގިނަ ފައިދާތަކެއް ލިބޭނެކަމަށް ލަފާކުރެވެއެވެ.