ފްރާންސްގެ ފުޓްބޯޅަ ކުޅުންތެރިޔާ އެންޓޮއިން ގްރީޒްމަން ވަނީ ކޯޗު ޑިޑިއޭ ޑެޝަމްޕްގެ ދިހަ އަހަރު ދުވަހުގެ އެންމެ މުހިންމު ކުޅުންތެރިޔާގެ މަގާމަށް ފަހު އޭނާގެ ބައިނަލްއަގުވާމީ ކެރިއަރު ނިމުނުކަން އިއްޔެ އިއުލާންކޮށްފަ އެވެ.

އިނގިރޭސި ނޫސް އެޖެންސީ ރޮއިޓާސް އިން ބުނާ ގޮތުގައި މިއަހަރުގެ ޔޫރޯ ކަޕްގައި އެންމެ މޮޅު ކުޅުމެއް ދެއްކި އުމުރުން 33 އަހަރުގެ ގްރިޒްމަން އަކީ 2018 ވަނަ އަހަރާއި 2022 ވަނަ އަހަރުގެ ވޯލްޑް ކަޕް މުބާރާތުގައި މުހިއްމު ދައުރެއް އަދާކުރި ކުޅުންތެރިއެކެވެ.

އެތުލެޓިކޯ މެޑްރިޑްގެ ކުޅުންތެރިޔާ ސޯޝަލް މީޑިއާގައި ބުނީ ފުން އިހުސާސްތަކަކާއެކު ފްރާންސް ޓީމުގެ ކުޅުންތެރިއެއްގެ ގޮތުގައި ރިޓަޔާކުރާކަން އިއުލާން ކުރަން ކަމަށެވެ.

"ފްރާންސްގެ ޖާޒީ ލައިގެން އުޅުމަކީ ވަރަށް ބޮޑު ޝަރަފެއް، ގޮންޖެހުންތަކާއި ކާމިޔާބީތަކާއި ހަނދާން ނައްތާނުލެވޭ ވަގުތުތަކުން ފުރިފައިވާ ހަނދާން އާވާ 10 އަހަރަށް ފަހު މިއީ އަހަރެން އާ ޖީލަކަށް ޖާގަ ދޭންވީ ވަގުތު،" ގްރީޒްމަން އިތުރަށް ބުންޏެވެ.

އެތުލެޓިކޯ މެޑްރިޑްގެ މިޑްފީލްޑަރު އަދި ޔޫރޯ ކަޕް 2016 ގެ ޓޮޕް ސްކޯރަރ އަކީ އޭނާގެ ޓީމުގެ ކުޅުންތެރިންނާއި ސަޕޯޓަރުންގެ މެދުގައި ވަރަށް ބޮޑު ފޭވަރިޓެއްގެ ގޮތުގައި ކުޅެފައިވާ ކުޅުންތެރިއެކެވެ.

އެންޓޮއިން ގްރިޒްމަން ވަނީ ފުޓްބޯޅަ ކެރިއަރުގައި 137 މެޗު ކުޅެ 44 ގޯލް ޖަހާފައެވެ.

ފާއިތުވި 10 އަހަރު ތެރޭގައި ގައުމީ ޓީމުގެ އެންމެ އަގުހުރި ކުޅުންތެރިޔާގެ ގޮތުގައި ގާއިމްވެފައިވާ މިޑްފީލްޑަރު ވަނީ ފްރާންސްގެ ގައުމީ ޓީމަށް ޖެހިޖެހިގެން 84 މެޗު ކުޅުމުގެ ރެކޯޑެއް ގާއިމްކޮށްފަ އެވެ.

މި މުނާސަބަތުގައި ފްރާންސްގެ ކޯޗު ޑިޑިއޭ ޑެޝަމްޕްސް ނެރުނު ބަޔާނެއްގައި ބުންޏެވެ. "މީގެ 10 އަހަރު ކުރިން ފްރާންސް ޓީމަށް ގްރީޒްމަން ފުރަތަމަ ފަހަރަށް ކުޅުނު ފަހުން އަހަރެމެންގެ ގުޅުން ބިނާވެފައި އޮތީ އިތުބާރާއި އިޚްލާސްތެރިކަމުގެ މައްޗަށް".

"އަހަރެމެންގެ ގުޅުމަކީ ވަރަށް ވަރުގަދަ ގުޅުމެއް އަދި ގްރީޒްމަން އަކީ އަހަރެންގެ ފޭވަރިޓް ކުޅުންތެރިޔާ، އަހަރެން ހިތުގެ އަޑިން އޭނާއަށް ޝުކުރު އަދާކުރަން،" ޑެޝަމްޕްސް އިތުރަށް ބުންޏެވެ.

ފްރާންސަށް 2021 ވަނަ އަހަރުގެ ނޭޝަންސް ލީގު ކާމިޔާބުކޮށްދިނުމަށް އެހީތެރިވެދިން ގްރީޒްމަން އަކީ އެ ޓީމުގެ ހުރިހާ ވަގުތެއްގައި ވެސް ގޯލް ޖެހި ހަތަރު ވަނަ ކުޅުންތެރިޔާ އެވެ.

ލަލީގާގައި އޭނާ ވަނީ ރެއާލް ސޮސިއެޑާޑް، އެތުލެޓިކޯ އަދި ބާސެލޯނާއާއެކު 500 އަށް ވުރެ ގިނަ މެޗު ކުޅެފަ އެވެ.