އިސްރާއީލުން ދިން ބޮޑެތި ހަމަލާ ތަކުގެ ސަބަބުން ލުބުނާނުގެ މިލިއަނަކަށްވުރެ ގިނަ މީހުން ހާލުގައި ޖެހޭނެ ކަމަށާއި ، ހާލުގައި ޖެހިފައިވާ މީހުންނށް އެހީތެރވެ މަސްރަހު ހަމަޔަކަށް އެޅުވުމަށް ބޭރުގެ އެހީއަށް އެދިފައިވާ ކަމަށް ލުބުނާނުގެ ބޮޑުވަޒީރު ނަޖީބު މިކާތީ ވިދާޅުވެއްޖެއެވެ.

އާދީއްތަ ދުވަހު މީޑިއާއާ ވާހަކަދައްކަވަމުން ބޮޑުވަޒީރު ވިދާޅުވީ ގެދޮރު ގެއްލިފައިވާ މީހުންގެ އަދަދު ވަރަށް ގިނަ ކަމަށާއި، އެއް މިލިއަނަށް އަރާފާނެ ކަމަށް ލަފާކުރެވޭ ކަމަށެވެ. "މިއީ ލުބުނާނުގައި ދިމާވެދާނެ އެންމެ ބޮޑު ޑިސްޕްލޭސްމަންޓް،" އޭނާ ވިދާޅުވިއެވެ.

ފާހަގަ ކުރެވޭ ގޮތުގައި ހުކުރު ދުވަހު އިސްރާއީލުން ވަނީ ބެއިރޫތުގެ މެދުތެރޭގައި ހުންނަ ހިޒްބުﷲގެ އޮފީހަކަށް ހަމަލާދީ ބާރުގަދަ ލީޑަރު ހަސަން ނަޞްރުﷲ އަވަހާރަ ކޮށްލާފައެވެ. އަދި މިދިޔަ ހޯމަ ދުވަހުން ފެށިގެން ލުބުނާނުގެ އިރުމައްޗާއި ދެކުނާއި ދެކުނު ބެއިރޫތަށް އިސްރާއީލުން ދިން ބޮޑެތި ހަމަލާތަކުގައި އެތައް ސަތޭކަ ބަޔަކު މަރުވެ، އެތައް ބަޔަކު ގެދޮރު ދޫކޮށް ފިލަން މަޖުބޫރު ވެފައި ވެއެވެ. މި ހަމަލާތައް ދީފައިވަނީ ޣައްޒާ ހަނގުރާމައާ ގުޅިގެން ހިޒްބުﷲ އާއި އެކު ބޯޑަރު ހުރަސްކޮށް ހިނގި ހަމަލާތަކެއް ހިނގިތާ ގާތްގަނޑަކަށް އަހަރެއްހާ ދުވަސް ފަހުން، އިސްރާއީލުން ލުބުނާނަށް އޮޕަރޭޝަންތަކުގެ ފޯކަސް ބަދަލުކުރި ދަނޑިވަޅެއްގައެވެ.

ލުބުނާނުގެ މި ނާޒުކު ހާލަތާއި ގުޅިގެން އދ. އިން ވަނީ ކަންބޮޑުވުން ފާޅުކޮށްފައެވެ. އަދި ދެ ފަރާތުން ވެސް ހަނގުރާމަ ހުއްޓާލުމަށް ގޮވާލާފައިވެއެވެ. ޚުދު އެމެރިކާއާއި ހުޅަނގުން ވެސް 3 ހަފްތާއަށް ހަނގުރާމަ ހުއްޓާލުމަށް ޔަހޫދީ ސަރުކާރަށް އެންގިއެވެ. ނަމަވެސް ޔަހޫދީ ސަރުކާރުން އެކަމަށް އިޖާބަ ނުދިންއިރު އެމެރިކާއިން އޭރު ވެސް ދިޔައީ ޔަހޫދީ ދައުލަތަށް އިތުރު ބޮމާއި ހަތިޔާރުތައް ދެމުންނެވެ.

މި ހާލަތުގައި ލުބުނާނުގެ ސަރުކާރުން ވަނީ ބޭރުގެ އެހީއަށް އެދިފައިވާއިރު، 

ގެދޮރު ދޫކޮށް ފިލަން މަޖުބޫރުވެފައިވާ މީހުންނަށް ވަގުތީ ހިޔާވަހިކަން ފޯރުކޮށްދިނުމަށް މަސައްކަތްތަކެއް ކުރަމުންދާ ކަމަށް ބޮޑުވަޒީރު ވިދާޅުވެފައިވެއެވެ.

ޣައްޒާ ހަނގުރާމަ ފެށުމާއި ގުޅިގެން ހިޒްބުﷲގެ ހަމަލާތަކަށް ރައްދު ދިނުމުގެ ގޮތުން އިސްރާއީލުން ފެށި ހަމަލާތަކުގައި މިހާތަނަށް ލުބުނާނުން 1640 މީހުން ޝަހީދުވެފައި ވާކަމަށް ހަބަރުތައް ބުނެއެވެ. އޭގެ ތެރޭގައި ލުބުނާންގެ 104 ކުޑަކުދިން،ނާއި 194 އަންހެނުން ހިމެނޭއިރު، މި ހަމަލާތަކުގައި މަދުވެގެން 8،408 މީހުން ވަނީ ޒަހަމް ވެފައެވެ. ލުބުނާނުގެ އެކި ސަރަހައްދު ތަކަށް ބޮން އެޅުމާއި ގުޅިގެން ގެދޮރު ދޫކޮށްލި މީހުންގެ އަދަދު 116،100 އަށް ވުރެ ގިނަ އެވެ. އިއްޔެގެ ނިޔަލަށް ރެފިއުޖީންގެ ގޮތުގައި ވަގުތީ ހިޔާގައި 777 މީހުން ތިބިއިރު، ރެފިއުޖީންގެ އަދަދު މިލިއަނަކަށް އަރާނެ ކަމަށް ލަފާ ކުރެވޭ ކަމަށް ބޮޑުވަޒީރު ވިދާޅުވިއެވެ. މިހާތަނަށް 230،000 އަސްވުރެ ގިނަ މީހުން ވަނީ ގައުމު ދޫކޮށް އެހެން ގައުމުތަކަށް ހިޖުރަ ކޮށްފައެވެ.