ބަލިމީހާގެ ސިއްޙީ ހުރިހާ ރެކޯޑެއް ބެލެހެއްޓޭނެ ޑިޖިޓަލް ނިޒާމެއް ޤާއިމްކުރަނީ

ރާއްޖޭގައި ބަލިމީހުންގެ ސިއްޙީ ހުރިހާ ރެކޯޑެއް ބެލެހެއްޓޭނެ ޑިޖިޓަލް ނިޒާމެއް ޤާއިމްކުރުމުގެ މަސައްކަތް ޞިއްހަތާ ބެހޭ ވުޒާރާއިން ފަށައިފިއެވެ.

މި މަސައްކަތަކީ "ނޭޝަނަލް ޑިޖިޓަލް ހެލްތު އާކިޓެކްޗަރ ބްލޫޕްރިންްރިންޓް" ގެ ނަމުގައި ކުރިއަށްގެންދާ މަޝްރޫޢެކެވެ.

ރާއްޖޭގައި ގައިން ގަޔަށް ނާރާ ބަލިތައް އިތުރުވަމުން ދިއުމާއެކު، ބަލިމީހުންގެ ސިއްޙީ މަޢުލޫމާތު ރައްކާތެރިކަމާއެކު ބެލެހެއްޓުމުގެ މުހިންމުކަން ވަނީ އިތުރުވެފައެވެ. ނަމަވެސް، ތަހުލީލުތަކުގެ ނަތީޖާތަކާއި ޑޮކްޓަރުންގެ ލިޔުންތައް ބަލިމީހުން އެންމެ ރައްކާތެރި ގޮތުގައި ނުގެންގުޅުމުގެ ކަންބޮޑުވުން ސިއްޙީ މާހިރުންގެ މެދުގައި އޮތްކަން ސިއްޙަތާ ބެހޭ ވުޒާރާއިން ފާހަގަކުރެއެވެ.

މި މައްސަލައަށް ހައްލެއް ހޯދުމަށްޓަކައި، ސިއްޙަތާ ބެހޭ ވުޒާރާއިން ވަނީ "ނޭޝަނަލް ޑިޖިޓަލް ހެލްތު އާކިޓެކްޗަރ ބްލޫޕްރިންޓް" އެކުލަވާލުމުގެ މަސައްކަތް ފަށާފައެވެ. މި ބްލޫޕްރިންޓަކީ ސިއްޙީ ދާއިރާގައި އެއްކުރެވޭ މަޢުލޫމާތުގެ ތެރެއިން ޢާންމު ރައްޔިތުންގެ މަޢުލޫމާތު އެމީހަކަށް ފެންނާނެހެން، ރައްކާކޮށް ބެލެހެއްޓޭނެ ނިޒާމެއް ޤާއިމުކުރުމަށް ބޭނުންވާ މަގުޗާޓެކެވެ.

ސިއްޙަތާ ބެހޭ ވުޒާރާއިން ބުނާ ގޮތުގައި، މި ނިޒާމު ޤާއިމުކުރެވުމުން ބަލިމީހާއަށް އޭނާގެ ސިއްޙީ ޙާލަތު ބައްޓަންކުރުމަށް ބާރުވެރިކަން ލިބި، މުޅި ސިއްޙީ ނިޒާމުގައި ހުރި އެމީހާގެ ހުރިހާ ހެލްތު ރިކޯޑެއް ފެންނަން ހުންނާނެ ކަމަށެވެ. މީގެ އިތުރުން، ސިއްޙީ ޚިދުމަތްތެރިންނަށް ބަލިމީހާއަށް އެންމެ އެކަށޭނަ ގޮތަށް ފަރުވާދިނުމަށް ބޭނުންވާ މުހިންމު މަޢުލޫމާތު ލިބުމުގައި ހުރި ގޮންޖެހުންތަކަށް ޙައްލެއް ލިބިގެންދާނެ ކަމަށް އެ ވުޒާރާއިން ބުންޏެވެ.

މި ބްލޫޕްރިންޓް އެކުލަވާލުމުގެ މަސައްކަތުގައި ސިއްޙީ ޚިދުމަތްތެރިންނާއި، ސިޔާސަތުތައް އެކުލަވާލާ ފަރާތްތަކާއި، ފަންނީ ތަޖުރިބާކާރުންނާއި، އަދި އެހެނިހެން ކަމާ ގުޅުންހުރި ފަރާތްތަކުގެ ލަފަޔާއި އިރުޝާދު ހޯދުމަށް މަސައްކަތު ބައްދަލުވުންތައް ވަނީ ބާއްވާފައެވެ. އަދި މި ބްލޫޕްރިންޓުގެ މަސައްކަތްތައް ނިންމާލުމުގެ ކުރިން ޢާންމުންގެ ޚިޔާލު ހޯދުމަށްވެސް ވަނީ ނިންމާފައެވެ.

ނޭޝަނަލް ޑިޖިޓަލް ހެލްތު އާކިޓެކްޗަރ ބްލޫޕްރިންޓް އެކުލަވާލުމުގެ މަސައްކަތް ސިއްޙަތާ ބެހޭ ވުޒާރާއިން ކުރިއަށްގެންދަނީ ދުނިޔޭގެ ސިއްޙަތު ޖަމްޢިއްޔާއާއި، އޭޝިއަން ޑިވެލޮޕްމަންޓް ބޭންކާ ގުޅިގެންނެވެ.

މި މަޝްރޫޢުގެ ސަބަބުން ސިއްޙީ ދާއިރާގެ ސިޔާސަތުތައް ކަނޑައެޅުމުގައި ހެކިތަކުގެ މައްޗަށް ބިނާވާ ނިންމުންތައް ނިންމުމަށް ބޭނުންވާ އަދާހަމަ މަޢުލޫމާތު ފަސޭހައިން ލިބޭނެ ނިޒާމެއް ޤާއިމުވެގެންދާނެކަމަށް ސިއްޙަތާ ބެހޭ ވުޒާރާއިން ބުނެފައިވެއެވެ.

ސިއްޙަތާ ބެހޭ ވުޒާރާއިން އިތުރަށް ފާހަގަކުރި ގޮތުގައި، މި މަސައްކަތް ނިމިގެންދާއިރު ބަލިތަކުން ރައްކާތެރިވުމަށް ދުރާލާ މަސައްކަތްކުރަން ޢާންމުންގެ މެދުގައި އިސްކަންދިނުމުގެ ޘަޤާފަތެއް އަށަގަނެވުމަކީ ދާއިމީ ބޮޑެތި ބަލިތަކުން އަރައިގަތުމަށް ޤައުމީ ފެންވަރުގައި ކުރެވޭނެ މުހިންމު މަސައްކަތެކެވެ.

މި ޑިޖިޓަލް ނިޒާމު ޤާއިމުކުރުމަކީ ރާއްޖޭގެ ސިއްޙީ ނިޒާމު ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ތެރެއިން ކުރެވޭ އެންމެ މުހިންމު އެއް މަސައްކަތްކަމަށް ސިއްޙަތާ ބެހޭ ވުޒާރާއިން ދެކެއެވެ.