ރާއްޖޭގައި ވޭޕްކުރުމުގެ ނުރައްކާތެރިކަން އިތުރުވަމުންދާކަން ފާހަގަކުރެވެމުންދާ ކަމަށް ތަޢުލީމީ ވުޒާރާއިން މިއަދު ހާމަކޮށްފިއެވެ. ޚާއްޞަކޮށް ސްކޫލް މާޙައުލުގައި މިކަމުގެ އަސަރު ބޮޑަށް ފެންނަމުންދާކަން ފާހަގަކުރެވޭ ކަމަށް ވުޒާރާގެ ސީނިއަރ އޮފިޝަލެއް ވިދާޅުވިއެވެ.
ތަޢުލީމީ ވުޒާރާއިން މިހާރު ވަނީ މިކަމާ ދެކޮޅަށް މަސައްކަތް ފަށައިފައެވެ. ސްކޫލްތަކާ ގުޅިގެން ހޭލުންތެރިކަން އިތުރުކުރުމުގެ މަސައްކަތް ކުރެވެމުންދާ ކަމަށް އެ އޮފިޝަލް ވިދާޅުވިއެވެ.
"ވޭޕްކުރުމަކީ ދުންފަތަށްވުރެ ރައްކާތެރި ކަމެއް ކަމަށް ދެކޭ މީހުން އެބަތިބި. އެކަމަކު އެއީ ވަރަށް ނުރައްކާތެރި ކަމެއް. ޚާއްޞަކޮށް ކުޑަކުދިންގެ މެދުގައި މި އާދަ ފެތުރެމުންދާތީ އަޅުގަނޑުމެން ވަ ވަރަށް ކަންބޮޑުވޭ،" އެ އޮފިޝަލް ވިދާޅުވިއެވެ.
Advertisement
ޑޮކްޓަރުންވެސް ވޭޕްކުރުމުގެ ނުރައްކާތެރިކަން ފާހަގަކުރަމުންދެއެވެ. އިންދިރާ ގާންދީ މެމޯރިއަލް ހޮސްޕިޓަލުގެ ޑޮކްޓަރެއް ވިދާޅުވި ގޮތުގައި ވޭޕްގައި ހިމެނޭ މާއްދާތަކަކީ ހަށިގަނޑަށް ނުރައްކާތެރި މާއްދާތަކެކެވެ.
"ވޭޕްގައި ހިމެނޭ ޑަޔަސީޓަލް ކިޔާ މާއްދާއިން ފުއްޕާމޭގެ ބްރޮންކިލްސް ހަލާކުކުރޭ. ފޯމަލްޑިހައިޑް ކިޔާ މާއްދާއިން ފުއްޕާމޭ އަދި ހިތުގެ ބަލިތަކަށް މަގުފަހިކުރޭ. އަދި އެކްރޮލެއިން ކިޔާ މާއްދާއަކީ ފުއްޕާމޭ ހަލާކުކުރާ ވިހަ މާއްދާއެއް،" އެ ޑޮކްޓަރު ވިދާޅުވިއެވެ.
ވޭޕްކުރުމަކީ ދާއިމީ ސިއްޙީ މައްސަލަތަކަށް މަގުފަހިކުރާ ކަމެއްކަން ފާހަގަކުރަމުން، ޒުވާނުންނާއި ސްކޫލް ކުދިން މި އާދައިން ދުރުހެލިވާން ޖެހޭކަމަށް އެ ޑޮކްޓަރު ވިދާޅުވިއެވެ. އަދި ސިއްޙަތަކީ އަގުހުރި އެއްޗެއްކަން ހަނދާންކުރުމަށް އެންމެންނަށް އިލްތިމާސްކުރެއްވިއެވެ.
