ދިރާސީ އަހަރުގެ ފުރަތަމަ ޓާމުގެ ކިޔެވުން ނިންމާލުމަށް ފަހު ދަރިވަރުންނަށް މިއަދު ރިޕޯޓު ފޯމް ހަވާލުކޮށްފިއެވެ.
މި އަހަރުގެ ފުރަތަމަ ޓާމުގެ ކިޔެވުން ފަށާފައިވަނީ މިދިޔަ މެއި މަހުގެ 26 ގައެވެ.
ފުރަތަމަ ޓާމުގެ ކިޔެވުން ނިންމާ ދަރިވަރުން މިއަދު ޗުއްޓީއަށް ގޮސްފައިވާއިރު ދެން ސްކޫލް ހުޅުވޭނީ އަންނަ މަހުގެ 5 ވާ އާދިއްތަ ދުވަހުއެވެ.
Advertisement
އެޑިއުކޭޝަން މިނިސްޓްރީން މަޢުލޫމާތު ދީފައިވާ ގޮތުގައި މިއަދު ނިމުނު ފުރަތަމަ ޓާމުގައި 96,000 ދަރިވަރުން ވަނީ ތަޢުލީމު ޙާޞިލްކޮށްފައެވެ. އޭގެ ތެރޭގައި ހިމެނެނީ 40,300 އަންހެން ދަރިވަރުންނާއި 42,700 ފިރިހެން ދަރިވަރުންނެވެ. އޭގެ ތެރެއިން 17,000 ދަރިވަރުންނަކީ މާލެ ސަރަޙައްދުގައި ތަޢުލީމް ޙާޞިލް ކުރަމުން އަންނަ ދަރިވަރުން ކަމަށް މިނިސްޓްރީން ވަނީ މީގެ ކުރިން ބުނެފައެވެ.
މީގެ އިތުރުން އަމިއްލަ މަދަރުސާތަކުގައި 13,000 އަށް ވުރެ ގިނަ ދަރިވަރުން ތަޢުލީމް ހާޞިލް ކުރިއިރު އޭގެ ތެރެއިންވެސް ގާތްގަނޑަކަށް 9,000 ދަރިވަރުން ތަޢުލީމް ޙާޞިލްކޮށްފައިވަނީ މާލެ ސަރަޙައްދުގައި ކަމަށް މިނިސްޓްރީން ބުންޏެވެ.
ފުރަތަމަ ޓާމުގެ ކިޔެވުން ފެށުނު އިރު ރާއްޖޭގެ ސްކޫލްތަކުގައި 12,662 މުދައްރިސުން ކިޔަވައިދޭނެ ކަމަށް މިނިސްޓްެރީން ބުނެފައިވާއިރު އޭގެ ތެރޭގައިވެސް ގިނައީ ދިވެހި މުދައްރިސުންކަން ފާހަގަކޮށްލެވެއެވެ. އެގޮތުން 10,729 ދިވެހި މުދައްރިސުން ފުރަތަމަ ޓާމުގައި ކިޔަވައިދީފައިވާއިރު ބިދޭސީ މުދައްރިސުންގެ ޢަދަދަކީ 1,933 ކަމަށް މިނިސްޓްރީން ބުންޏެވެ.
ސަރުކާރު ގިނަ ސްކޫލްތަކުގައި ފުރަތަމަ ޓާމު ކިޔަވައިދީފައިވަނީ އެއް ދަންފަޅިއަށެވެ. އެގޮތުން 162 ސަރުކާރު ސްކޫލެއްގައި އެއް ދަންފަޅިއަށް ކިޔަވައިދީފައިވާއިރު 55 ސްކޫލެއްގައި ކިޔަވައިދީފައިވަނީ ދެ ދަންފަޅިއަށެވެ.
