ރާއްޖެއަށް ލިބޭ ހައްޖު ކޯޓާ އިތުރުވާނެ ކަމުގެ ފެހި ސިގްނަލް ރައީސުލް ޖުމްހޫރިއްޔާ ޑރ.މުޙައްމަދު މުޢިއްޒުއަށް ސައޫދީ ސަރުކާރުން ދެއްވައިފިއެވެ.
ސައުދީ އަރަބިއްޔާއިން މި ފެހި ސިގްނަލް ރައީސް މުއިއްޒުއަށް ދެއްވީ މިހާރު ނިއުޔޯކުގައި ކުރިޔަށްދާ އދގެ މުހިއްމު ބައްދަލުވުންތަކުގެ ހަވާސާ ތެރެއިން ސައޫދީ ސަރުކާރުގެ ވަފްދާއި ރައީސުލް ޖުމްހޫރިއްޔާ ޑރ.މުހައްމަދު މުޢީއްޒު ބޭއްވި ބައްދަލުކުރެއްވުމުގައެވެ. މި މަޝްވަރާތައް ކުރިއަށް ގެންގޮސްފައިވަނީ އދ.ގެ އާންމު މަޖިލީހަށް ސައުދީ ވަފުދު އިސްކޮށް ހުންނެވި ސައުދީގެ ޕްރިންސް ފައިސަލް ބިން ފަރުހާން އަލް ސައުދު އާއެކުގައެވެ.
ދިވެހީންގެ ރައީސް ޑރ.މުޙައްމަދު މުޢިއްޒު ވަނީ ދެގައުމުގެ ދެމެދުގައި އޮންނަ ބަދަހި ގުޅުމަށް އަލިއަޅުވާލައްވައި ތަރައްގީގެ މަޝްރޫއުތައް ހިމެނޭ ގޮތަށް އެކި ދާއިރާތަކުން ސައުދީ އަރަބިއްޔާއިން ދެމުންދާ އެއްބާރުލުމަށް ޝުކުރު އަދާކުރައްވާފައެވެ. ރައީސުލްޖުމްހޫރިއްޔާ ވަނީ ރާއްޖޭގެ އިޤްތިޞާދު ކުރިއަރުވައި ހަމައަކަށް އެޅުވުމަށް ކުރާ މަސައްކަތަށް އެހީތެރިވެދިނުމުގައި ސައުދީން އަދާކުރާ މުހިންމު ދައުރު ފާހަގަކުރައްވާފައެވެ.
މިބައްދަލުވުމުގައި މަޝްވަރާ ކުރެވުނު މުހިންމު އެއް މައްސަލައަކީ ދިވެހިންނަށް ހައްޖު ކޯޓާ އިތުރުކޮށްދިނުމަށް ރާއްޖެއިން އެދޭކަމެވެ.
މިބައްދަލުކުރެއްވުމުގައި ރައީސް ވަނީ ، ހައްޖުގެ މާތް އަޅުކަމަށް މައްކާއަށް ދިޔުމަށްޓަކައި ކޮންމެ އަހަރަކު ވެސް ފައިސާ އެއްކޮށްގެން އެހެންނަމަވެސް ކޯޓާ ލިބޭލެއް މަދު ވުމުގެ ސަބަބުން ވަރަށް ގިނަ ދިވެހި ރައްޔިތުން ކިޔޫގައި ތިބެންޖެހޭތީވެ އެކަމުގެ ކަންބޮޑުވުން ފާޅުކުރައްވާފައެވެ. އަދި ރާއްޖެއަކީ ސައޫދީ ފިޔަވައި ދެން މި ދުނިޔޭގައި އޮތް ހަމައެކަނި ސައްތައިން ސައްތަ އިސްލާމީ ދައުލަތް ކަމަށް ވާއިރު ، ހައްޖު ކޯޓާ ރާއްޖެއަށް އިތުރު ކުރުމަކީ ދިވެހި ރައްޔިތުން އެދޭ ވަރަށް ބޮޑު އެދުމެއް ކަމަށް އެމަނިކުފާނު ވަނީ ފާހަގަ ކުރައްވާފައެވެ.
އެކަމާ ގުޅިގެން ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރުހާން އަލް ސައުދު ވަނީ ރާއްޖެއަށް ހައްޖު ކޯޓާ ފުޅާކުރުމަށް މަޝްވަރާ ކުރުމަށް ސައުދީ ސަރުކާރުން ހުޅުވާލެވިފައިވާ ކަމަށް ވިދާޅުވެފަ އެވެ. އަދި ތަރައްގީގެ ދާއިރާ ހިމެނޭ ގޮތަށް ރާއްޖެއަށް އެކި ގޮތްގޮތުން އެހީތެރިކަން ފޯރުކޮށްދިނުމަށް ސައުދީ އަރަބިއްޔާއިން ދެމިއޮތް ކަމުގެ ޔަގީންކަން އެމަނިކުފާނު ދެއްވި އެވެ.
