ހުއްދަ ނެތި ހިޖާމާ ޖެހުމުގެ މަސައްކަތް ކުރަމުންދާތީ، ރާއްޖޭގައި އެންމެ ފުޅާކޮށް ހިޖާމާ ކްލިނިކެއް ހިންގަމުންދާ ފަޒީލާ އުސްމާން (ފަޒީ) ގެ "ފަޒީސް ހިޖާމާ ތެރަޕީ" ބަންދުކޮށްދިނުމަށް ހެލްތު މިނިސްޓްރީން ޕޮލިހުގައި އެދިއްޖެއެވެ.
ހެލްތު މިނިސްޓްރީން މި ފިޔަވަޅު އަޅަން ނިންމީ، ލައިސަންސް ލިބެންދެން އެތަނުން ދެމުންދާ ހިޖާމާ ފަރުވާގެ ޚިދުމަތް ހުއްޓާލުމަށް އެންގި އެންގުމަށް ފަޒީލާ ބޯނުލެނބުމުންނެވެ. މިކަމާ ގުޅިގެން ފުލުހުން ބުނީ ހުޅުމާލޭގައި ހިންގާ މި ކްލިނިކްގެ މައްސަލަ ބަލައިދިނުމަށް ހެލްތު މިނިސްޓްރީން އެދިފައިވާ ކަމަށާއި، މިހާރު އެ މައްސަލަ ތަޙުޤީޤު ކުރަމުން އަންނަ ކަމަށެވެ.
ހެލްތު މިނިސްޓްރީން ފަޒީލާ އުސްމާނަށް ޚިދުމަތް ހުއްޓާލުމަށް އަންގާފައިވަނީ، މިނިސްޓްރީއަށް ލިބެމުންދާ ޝަކުވާތަކަށް ބިނާކޮށް، އޭނާއާ ބައްދަލުކޮށް ރަޖިސްޓްރީކޮށްގެން ހިޖާމާގެ ޚިދުމަތް ދިނުމަށް އެންގުމަށްފަހުގައެވެ. މީގެ އިތުރުން، ސޯޝަލް މީޑިއާގައި ކޮށްފައިވާ އިޝްތިހާރުތަކަކީ މިނިސްޓްރީގެ ހުއްދަ ލިބިގެން މެނުވީ ނުކުރެވޭނެ ކަންކަން ކަމަށްވާތީ، އެފަދަ އިޝްތިހާރުތައް ނެގުމަށާއި، ސޯޝަލް މީޑިއާގައި ބަލިމީހުންގެ މެޑިކަލް ރިޕޯޓުތަކުގެ މަޢުލޫމާތު ޝާއިޢުކުރުން ހުއްޓާލުމަށްވެސް އަންގާފައިވެއެވެ.
Advertisement
"ފަޒީސް ހިޖާމާ ތެރަޕީ" އަކީ ރާއްޖޭގައި އެންމެ ފުޅާ ދާއިރާއެއްގައި ހިޖާމާގެ ފަރުވާ ދެމުން އަންނަ އެއް ތަނެވެ. 2019 ވަނަ އަހަރުވެސް ހެލްތު މިނިސްޓްރީން ވަނީ މި ތަން ބަންދު ކުރުމަށް އަންގާފައެވެ.
ޤާނޫނުގައިވާ ގޮތުން، ލައިސަންސް ނެތި ޚިދުމަތް ދޭނަމަ 75,000 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާ ކުރެވޭނެއެވެ. އަދި ޤާނޫނުގެ ދަށުން ޚިދުމަތް ދެމުންދާ ތަން ބަންދުކުރުމުގެ ބާރުވެސް ލިބިގެންވެއެވެ.
