ރޭ ސަންޓިއާގޯ ބާނަބޭއުގައި އެސްޕަނިއޯލް އަތުން 4-1 އިން މޮޅުވެ ރެއާލް މެޑްރިޑް ވަނީ ލަލީގާގެ އެއްވަނައިގައި އޮތް ބާސެލޯނާއާ އެއް ޕޮއިންޓް އަށް ކައިރިއަށް ޖެހިލާފައެވެ.
ރިއަލް މެޑްރިޑް ލަލީގާގެ އެއްވަނައިގައި އޮތް ބާސެލޯނާއާ އެއް ޕޮއިންޓާ ގާތަށް ޖެހިލިއިރު، ބްރެޒިލްގެ ފޯވާޑް ވިނިސިއަސް ޖޫނިއާ ވަނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރުމަށްފަހު މޮޅު ކުޅުމެއް ދައްކައި، ގޯލަކާއި އެސިސްޓެއް ހަދާފައެވެ.
ފުރަތަމަ ހާފުގައި އެސްޕަނިއޯލްގެ ކީޕަރު ޖޯން ގާސިއާ ވަނީ ރެއާލްގެ މުހިއްމު އެތައް ސޭވްތަކެއް ކޮށްފައިކަން ފާހަގަ ކުރެވެއެވެ.
Advertisement
ފުރަތަމަ ހާފުގައި ރިއަލް މެޑްރިޑަށް އެސްޕެންޔޯލްގެ ގޯލު ފޫއަޅުވާލެވޭ ގޮތެއް ނުވިއެވެ. ނަމަވެސް ދެވަނަ ހާފުގެ ކުރީކޮޅު އެސްޕަނިއޯލްއިން ލީޑު ނެގިއެވެ. އެއީ ރެއާލްގެ ކީޕަރު ތިބައުޓް ކޯޓޫއާ އަތުން 54ވަނަ މިނެޓުގައި ބައިކޮޅަށް ވަން ގޯލެކެވެ.
ރިއާލުން އަވަސް ރައްދުތަކެއް ދިންއިރު، އޭގެ ހަތަރު މިނެޓް ފަހުން ވަނީ ގާސިއާ އަށް ހެދުނު ގޯހެއްގެ ފައިދާ ނަގައިގެން ނަތީޖާ ހަމަހަމަކުރި އެވެ. އެއީ 58ވަނަ މިނެޓުގައި ޖޫޑް ބެލިންހަމް ދިން ހުރަހެއް ޑަނީ ކަރްވަހާލް ގޯލަށް ވައްދައިގެންނެވެ.
މެޗުގެ 75 ވަނަ މިނެޓްގައި ވިނިޝިއަސް ވަނީ ރޮޑްރިގޯއަށް އެސިސްޓެއް ދީ، ރިއަލްއިން 2-1 އިން ލީޑު ނަގައިދީފައެވެ. އޭގެ އިރުކޮޅެއް ފަހުން ވިނިޝިއަސް ވަނީ ކައިލިއަން އެމްބާޕޭ ދިން ޕާހަކުން ރެއާލްގެ ތިން ވަނަ ލަނޑު ކާމިޔާބުކޮށްދީފައެވެ. އެމްބާޕޭ ވަނީ މެޗުގެ 90 ވަނަ މިނެޓްގައި ލިބުނު ޕެނަލްޓީއަކުންގޯލެއް ޖަހާފައެވެ.
މި މޮޅާއެކު ރެއާލް މެޑްރިޑް 14 ޕޮއިންޓަށް ކުރިއަރާފައިވާއިރު، ފަސް މެޗުން 15 ޕޮއިންޓާއެކު ލީގުގެ އެއްވަނައިގައި އޮތީ ބާސެލޯނާއެވެ. ރިއަލްގެ ދެން ކުޅޭ މެޗަކީ ބުދަ ދުވަހު އަމިއްލަ ދަނޑުގައި ޑިޕޯޓިވޯ އަލަވޭސްއާ ދެކޮޅަށް ކުޅޭނެ މެޗެވެ.
