ތައުލީމާ ބެހޭ ވުޒާރާއިން ޓީޗަރުންނަށްވުމަށް ޝައުގުވެރިކަން ހުރި ކުދިން ހޯދުމުގެ މަސައްކަތް ފަށައިފި ކަމަށް އެ ވުޒާރާއިން ބުނެފިއެވެ. މި މަސައްކަތުގެ ދަށުން މުދައްރިސުން ތަމްރީނު ކުރުމުގެ ގައުމީ ޕްރޮގްރާމާ ގުޅޭ ގޮތުން މަތީ ސާނަވީއަށް ކިޔަވާ ދަރިވަރުންނަށް މައުލޫމާތު ދިނުމުގެ ސެޝަންތަކެއް ފަށާފައިވާ ކަމަށާއި، މި ސެޝަންތައް ކުރިއަށް ގެންގޮސްފައިވަނީ މާލެ އަދި ހުޅުމާލޭގެ ސީއެޗްއެސްސީގައި ކަމަށް ތައުލީމާ ބެހޭ ވުޒާރާއިން މައުލޫމާތު ދެއެވެ.
މި ޕްރޮގްރާމުގެ ދަށުން އޭލެވެލް އަށް ކިޔެވުމުގެ މަރުހަލާ ފަށާ ދަރިވަރުންގެ ތެރެއިން ޓީޗަރަކަށް ވާން ބޭނުންވާ ކުދިންނަށް 1،500 ރުފިޔާގެ އެލަވަންސެއް ދިނުމަށް ނިންމާފައިވާ ކަމަށްވެސް އެ ވުޒާރާއިން ހާމަކޮށްފައި ވެއެވެ.
ތައުލީމާ ބެހޭ ވުޒާރާގެ ސްޓޭޓް މިނިސްޓަރު ޑރ. އަހުމަދު މުހައްމަދު ވިދާޅުވީ ރާއްޖެ އަށް ދިމާވެފައިވާ ޓީޗަރުންގެ ދަތިކަމަށް ހައްލެއް ގެނައުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އަދި މިފަހަރު ގްރޭޑް 11 އަށް ވަންނަ ދަރިވަރުންގެ ތެރެއިން ޓީޗަރަކަށް ވާން ބޭނުންވާ ކުދިންނަށް ސްޓައިޕެންޑެއް ދިނުމަށް ނިންމާފައިވާ ކަމަށް އޭނާ ވިދާޅުވިއެވެ.
Advertisement
މި ޕްރޮގްރާމަކީ ރާއްޖޭގައި ދިމާވެފައިވާ ޓީޗަރުންގެ ދަތިކަން ހައްލުކުރުމަށް އަޅާ ފިޔަވަޅެކެވެ. މީގެ ސަބަބުން ޓީޗަރުންނަށްވުމަށް ޝައުގުވެރިކަން ހުރި ދަރިވަރުންނަށް އިތުރު ހިތްވަރެއް ލިބިގެންދާނެ ކަމަށް ތައުލީމާ ބެހޭ ވުޒާރާ ބުންޏެވެ.
