މިދިޔަ އަހަރު އެންމެ ގިނަ މީހުން ޑޮކްޓަރަށް ދެއްކީ އަންހެނުންގެ ބަލިތަކަށް

މިދިޔަ އަހަރު އެންމެ ގިނަ މީހުން ޑޮކްޓަރަށް ދެއްކީ އަންހެނުންނަށް ޖެހޭ ބަލިތަކާ ގުޅިގެން ކަމަށް ޞިއްޙީ ދާއިރާގެ މިދިޔަ އަހަރުގެ ތަފާސްހިސާބުތަކުން ދައްކައިފިއެވެ.

ހެލްތު މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިދިޔަ އަހަރު އެންމެ ގިނައިން ޑޮކްޓަރަށް ދެއްކީ އޮބްސްޓެޓްރިކްސް އަދި ގައިނެކޮލޮޖީ ނުވަތަ އަންހެނުންގެ ބަލިތަކާ ގުޅިގެންނެވެ. މި ދާއިރާއިން ފަރުވާ ހޯދި މީހުންގެ ތެރޭގައި ދަރިމައިވުމުގެ މައްސަލަތަކަށް ފަރުވާ ހޯދި އެއް އިންސައްތަ ފިރިހެނުން ވެސް ހިމެނޭ ކަމަށް ތަފާސްހިސާބުތަކުން ދައްކައެވެ.

ދެވަނައަށް އެންމެ ގިނަ މީހުން ޑޮކްޓަރަށް ދެއްކީ އެތެރެހަށީގެ ބަލިތަކާ ގުޅިގެންނެވެ. މި ދާއިރާއިން ފަރުވާ ހޯދި މީހުންގެ 61 އިންސައްތައަކީ އަންހެނުންނެވެ. ތިންވަނައަށް އެންމެ ގިނައިން ޑޮކްޓަރަށް ދެއްކީ ކުޑަކުދިންގެ ޚާއްސަ ބަލިތަކާ ބެހޭ ދާއިރާ ކަމުގައިވާ ޕީޑިއެޓްރިކްސްއަށެވެ.

މިދިޔަ އަހަރު ޖުމުލަ 3،183،577 ފަހަރު މީހުން ޑޮކްޓަރަށް ދައްކާފައިވާއިރު، އޭގެ ތެރެއިން 54 އިންސައްތަ ނުވަތަ 1,719,980 ޕޭޝެންޓުންނަކީ އަންހެނުންނެވެ. ފިރިހެނުންގެ ނިސްބަތަކީ 46 އިންސައްތައަށް ވާއިރު އެއީ 1,463,597 ޕޭޝެންޓުންނެވެ.

ސިއްޙީ ދާއިރާގައި އަންހެނުންނާއި ކުޑަކުދިންގެ ސިއްހަތަށް ޚާއްސަ އަހަންމިއްޔަތުކަމެއް ދޭ ކަމަށް ހެލްތު މިނިސްޓްރީން ބުނެފައިވެއެވެ. މި ތަފާސްހިސާބުތަކުން ދައްކާ ގޮތުގައި ގިނަ ދާއިރާތަކުން ފަރުވާ ހޯދާ މީހުންގެ ތެރެއިން އަންހެނުންގެ ނިސްބަތް މަތިވެފައިވާކަން ފާހަގަކުރެވެއެވެ.