ރާއްޖެއިން ބައިވެރިވާ ބައިނަލްއަގުވާމީ ބައްދަލުވުންތަކުގެ މަގުސަދު ހާސިލުވާ ކަމަށާއި، ކުދި ޖަޒީރާ އެހެން ގައުމުތަކާ އަޅާބަލާއިރު ރާއްޖެ އޮތީ ވަރަށް އެޑްވާންސް ލެވަލެއްގައި ކަމަށް ތިމާވެއްޓާ ބެހޭ މިނިސްޓަރު ތޯރިގް އިބްރާހިމް ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ތޯރިގް ވިދާޅުވީ، ހަމައެކަނި އިޔާދަކުރަނިވި ހަކަތައިގެ ދާއިރާއިން ބެލިޔަސް، ކުދި ޖަޒީރާ އެހެން ގައުމުތަކަށް ވުރެ ރާއްޖެއިން ކުރިއެރުން ހޯދާފައިވާ ކަމަށެވެ.
"އިޔާދަކުރަނިވި ހަކަތައިގެ ދާއިރާއިން ރާއްޖެ، މި ސިޑްސްގެ ގައުމުތަކަށް (ޖަޒީރާ ގައުމުތަކަށް) ބަލާ ކަމަށްވާ ނަމަ އެ ދާއިރާއިން އަޅުގަނޑުމެން ހާސިލް ކޮށްފައި މި އޮތީ ވަރަށް އުފާކުރަންވާ (ކާމިޔާބީއެއް) އަދި ރަނގަޅު ހިސާބެއްގައި މި އޮތީ. ވަރަށް މުހިންމު އެމްބިޝަސް ޕްލެޖުތަކެއް އަދި ކުރިއަށް އޮތް ތަނުގައި ވެސް ހާސިލްކުރަން ރައީސުލްޖުމްހޫރިއްޔާ ވެސް ވައުދުވެވަޑައިގެންފައި އޮތީ،" ތޯރިގް ވިދާޅުވިއެވެ.
Advertisement
ތޯރިގް އިތުރަށް ވިދާޅުވީ، "ކުދި ޖަޒީރާ ގައުމުތަކާ އަޅާ ބަލަންޏާ އަޅުގަނޑުމެން މި ތިބީ ވަރަށް އެހެން ހަރުފަތެއްގައި، އެހެން ގައުމުތަކާ އަޅާ ބަލާއިރު ވަރަށް އެޑްވާންސް ލެވަލެއްގައި" އެވެ.
ތޯރިގް މިހާރު ތައްޔާރުވެ ވަޑައިގަންނަވަމުން އަންނަނީ މި މަހު ބާއްވާ އދ. ގެ އާންމު މަޖިލީހުގެ ބައްދަލުވުމާއި އެ ބައްދަލުވުމުގެ ހަވާސާގައި ބާއްވާ އިވެންޓުތަކަށެވެ. އޭގެ ތެރޭގައި ރާއްޖެއިން އިންތިޒާމުކުރާ ބައެއް ސައިޑް އިވެންޓުތައް ވެސް ހިމެނެއެވެ. އެ ބައްދަލުވުންތަކުގައި ބައިވެރިވެވަޑައިގަތުމަށް މިއަދު އެމެރިކާގެ ނިއު ޔޯކަށް ފުރާވަޑައިގަންނަވާނެ ކަމަށް ތޯރިގް ވިދާޅުވިއެވެ.
މި މަހު ބާއްވާ އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވާނެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ތޯރިގް ވިދާޅުވީ ތިމާވެއްޓާ ގުޅޭ އެކި ޕްރޮޖެކްޓުތައް ރާއްޖޭގައި ހިންގުމަށް ބޭނުންވާ ފައިނޭންސް ހޯދުމަށް މަގުފަހިކޮށްދެނީ މި ކަހަލަ ބައިނަލްއަގުވާމީ ބައްދަލުވުންތައް ކަމަށެވެ. މިދިޔަ މެއި މަހު ކެރީބިއަންގެ ގައުމެއް ކަމަށްވާ އެންޓީގާއި ބޭއްވި އދ. ގެ ކުދި ޖަޒީރާ ގައުމުތަކުގެ ބައްދަލުވުން "ސިޑްސް ކޮންފަރެންސް"ގެ ސަބަބުން ވެސް އެ ކަންކަން ފަހިވި ކަމަށް އޭނާ ވިދާޅުވިއެވެ.
އޭގެ އެއް މިސާލެއްގެ ގޮތުގައި ތޯރިގް ވިދާޅުވީ، ރައީސް މުއިއްޒުގެ ވައުދާ އެއްގޮތަށް، މީހުން ދިރިއުޅޭ ގޭގޭގެ ފުރާޅުގައި ސޯލާ ޕެނަލް ހަރުކުރުމަށް މިދިޔަ އަހަރު ފެށި "މަގޭ ސޯލާ" ޕްރޮޖެކްޓަށް ބޭނުންވާ އިތުރު ފައިނޭންސް ވެސް އެ ކޮންފަރެންސަށް ފަހު ހަމަޖެހުމެވެ. ޖުމްލަ ތިން މެގަވޮޓްގެ ސޯލާ ޕީވީ ނިޒާމް ހަރުކުރާ ގޮތަށް ފެށި އެ ޕްރޮޖެކްޓަށް އިތުރު ހަތަރު މެގަވޮޓްގެ ސޯލާ ޕީވީ ނިޒާމް ހަރުކުރާނެ ފައިނޭންސް، އެ ކޮންފަރެންސްއަށް ފަހު ވަނީ ހަމަޖެހިފައެވެ.
ހަަމައެހެންމެ، އެ ސޯލާ ޕީވީ ނިޒާމުތައް އަންނަ މަހުގެ ނިޔަލަށް ރާއްޖެއަށް ގެނެވޭނެ ކަމަށް ވެސް ތޯރިގް ވިދާޅުވިއެވެ.
"ސިޑްސް ކޮންފަރެންސް ކަހަލަ މީޓިންތަކުން އަޅުގަނޑުމެންނަށް އިތުރަށް މި ކަހަލަ ސިސްޓަމް އެންހޭންސް ކުރަން ފުރުސަތު ލިބިގެންދޭ،" ތޯރިގް ވިދާޅުވިއެވެ.
އދ. އާންމު މަޖިލީހުގެ ހަވާސާގައި ރާއްޖެއިން އިންތިޒާމުކޮށްގެން "ދަ ސަމިޓް އޮފް ދަ ފިއުޗާ ސައިޑް އިވެންޓް: އަ ވިޝަން ފޯ އޭން އިންޓެލިޖެންޓް ފިއުޗާ" ގެ ނަމުގައި އިވެންޓެއް ބޭއްވުމަށް ވެސް ހަމަޖެހިފައިވާ ކަމަށް ތޯރިގް ވިދާޅުވިއެވެ.
