ތިލަފުށީގައި ތަރައްޤީކުރާ ކުނި މެނޭޖުކުރާ ރީޖަނަލް ސެންޓަރާއެކު ބައެއް ކުދި ރަށްތަކަށް ދިމާވެފައިވާ ކުނި މެނޭޖްކުރުމުގެ މައްސަލައަށް ވަށައިޖެހޭ ހައްލެއް ލިބޭނެކަމަށް މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.
ވަޒީރު މިހެެން ވިދާޅުވީ މިއަދު ސާފު ރާއްޖެ ބިލްޑިންގައި ބޭއްވި، ކުނި މެނޭޖުކުރުމުގައި ބޭނުންކުރާ އުޅަނދުތަކާއި އާލާތްތައް 20 ރަށެއްގެ ކައުންސިލާއި ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ޠާރިޤް ވިދާޅުވީ، މާލެ ސަރަހައްދުގައި ހިމެނޭ ކުދި ރަށްތަކަށް ދިމާވާ އެންމެ ބޮޑު މައްސަލައަކީ ރައްކާތެރި ގޮތުގައި ކުނި މެނޭޖު ނުކުރެވުން ކަމަށެވެ. އަދި މިގޮތަށް ދިމާވަނީ އެ ރަށްރަށުގައި ކުނި މެނޭޖްކުރަން ބޭނުންވާ ޢިމާރާތްތައް އަޅަން ބިން ނެތުމުން ކަމަށް ވެސް ވަޒީރު ވިދާޅުވިއެވެ.
Advertisement
"ގްރޭޓަރ މާލޭ އެންވަރަޔަމަންޓް އިމްޕްރޫވްމެންޓް އެންޑް ވޭސްޓް މެނޭޖްމެންޓް ޕްރޮޖެކްޓްގެ ދެވަނަ ފިޔަވަހީގެ ދަށުން ތިލަފުށީގައި ކުނި މެނޭޖްކުރުމުގެ ރީޖަނަލް ސެންޓަރެއް ތަރައްޤީކުރެވޭނެ. މި ސެންޓަރާއެކު މާލެ ސަރަހައްދުގައި ހިމެނޭ ކުދި ރަށްތަކުގައި ކުނި މެނޭޖްނުކުރެވޭ މައްސަލައަށް ވަށައިޖެހޭ ހައްލެއް ލިބޭނެ," ވަޒީރު ވިދާޅުވިއެވެ.
"ވޭސްޓް މެނޭޖްމެންޓް ސެންޓަރ ހެދުމުގެ މަސައްކަތް 2026 ގައި ނިންމާގޮތަށް ރޭވިފައި އޮތީ. މިތަނުން ރަށްރަށުން މެނޭޖް ނުކުރެވޭ ކުނި އެތަނަށް ގެންގޮސް މެނޭޖްކުރެވޭނެ. އަޅުގަނޑުމެން މިހާރު މިދަނީ މި ސެންޓަރަށް ބޭނުންވާ ލޭންޑިން ކްރާފްޓްތައް ހޯދަމުގެ މަސައްކަތްވެސް ކުރަމުން." ވަޒީރު އިތުރަށް ވިދާޅުވިއެވެ.
މިއަދުގެ ރަސްމިއްޔާތުގައި 20 ރަށަކަށް ކުނި މެނޭޖްކުރުމުގައި ބޭނުންކުރާ ތަކެތި ފޯރުކޮށްދީފައި ވެއެވެ. މީގެ ތެރޭގައި ހިމެނެނީ ކުނި ޓްރަކާއި ޑަސްބިނާއި ރައްކާތެރި ގޮތުގައި ކުނި ގުދަންކުރުމަށް ބޭނުންކުރާ ބޭލަރ މެޝިނެވެ. 18 ރަށަކަށް ކުނި ޓްރަކް ހަވާލުކޮށްފައިވާއިރު 15 ރަށަކަށް ބޭލަރ މެޝިން ވަނީ ހަވާލުކޮށްފައެވެ. އަދި 5000 އަށްވުރެ ގިނަ ޑަސްބިން ހަވާލުކޮށްފައި ވާކަމަށް ތިމާވެށްޓާބެހޭ ވުޒާރާއިން މަޢުލޫމާތު ދެއްވިއެވެ.
ތަކެއްޗާ ހަވާލުވުމަށްފަހު ޕީއެސްއެމް ނިއުސްއާ ވާހަކަދެއްކި ކައުންސިލްތަކުގެ ބޭފުޅުން ވިދާޅުވީ މިއީ މިވަގުތު އެ ރަށްރަށަށް ވަރަށް ބޮޑަށް ބޭނުންވެފައިވާ ތަކެތިކަމަށެވެ.
"ވަރަށް ރަނގަޅު އާލާތްތަކެއް މިއަދު ލިބިގެން މިދިޔައީ. މީގެ ސަބަބުން އަޅުގަނޑުމެންގެ ރަށުގެ ކުނި މެނޭޖްކުރުމަށް ވަރަށް ބޮޑު ލުއި ފަސޭހަތަކެއް ލިބިގެންދާނެ. އަޅުގަނޑުމެން މިތިބީ އަބަދުވެސް ސަރުކާރަށް އެއްބާރުލުންދީގެން މިކަމުގައި އެހީވާން," ކައުންސިލްގެ އިސް ބޭފުޅެއް ވިދާޅުވިއެވެ.
މި މަޝްރޫޢުގެ ދަށުން ތިލަފުށީގައި ހެދޭ ކުނި މެނޭޖްކުރާ ރީޖަނަލް ސެންޓަރުގެ މަސައްކަތް 2026 ވަނަ އަހަރު ނިމޭނެކަމަށް ލަފާކުރެވެއެވެ. މި ސެންޓަރު ނިމުމުން، މާލެ ސަރަހައްދުގެ ކުދި ރަށްރަށުން މެނޭޖް ނުކުރެވޭ ކުނި މި ސެންޓަރަށް ގެންގޮސް މެނޭޖްކުރެވޭނެއެވެ.
ސަރުކާރުން މިފަދަ މަޝްރޫޢުތައް ހިންގަމުންދަނީ ރާއްޖޭގެ ރަށްތަކުގައި ކުނި މެނޭޖްކުރުމުގެ ނިޒާމު ހަރުދަނާކޮށް، ތިމާވެށި ރައްކާތެރިކުރުމުގެ މަޤްޞަދުގައެވެ.
