އިންޑިއާގެ ހައި ކޮމިޝަނަރ އެޗް. އީ. މުނު މަހާވަރު މިއަދު މޫސިމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ މިނިސްޓަރ ޠާރިޤް އިބްރާހީމް އާއި ބައްދަލުކުރައްވައިފިއެވެ. މިނިސްޓްރީގައި ބޭއްވުނު މި ބައްދަލުކުރެއްވުމަކީ ކާޓަސީ ކޯލެއްގެ ގޮތުގައި ކުރެއްވި ބައްދަލުކުރެއްވުމެކެވެ.
މި ބައްދަލުކުރެއްވުމުގައި ދެ ފަރާތުން މަޝްވަރާކުރެއްވި މައިގަނޑު މައުޟޫއަކީ ހަކަތައިގެ ދާއިރާގައި ދިވެހިރާއްޖެއާއި އިންޑިއާއާ ދެމެދު އޮންނަ އެއްބާރުލުން އިތުރަށް ހަރުދަނާކުރުމެވެ. މީގެ އިތުރުން، ދެ ޤައުމުގެ ދެމެދުގައި އޮތް ރަޙްމަތްތެރިކަމާއި އެކުވެރިކަން އިތުރަށް ބަދަހިކުރުމުގެ މުހިންމުކަމާ މެދުވެސް ވާހަކަދެކެވުނެވެ.
ބައްދަލުކުރެއްވުމުގައި، ކުރިއަށް އޮތް ތަނުގައި ދެ ޤައުމުގެ ދެމެދުގައި ހަކަތައިގެ ދާއިރާއިން ކުރެވިދާނެ އިތުރު މަސައްކަތްތަކާ ބެހޭގޮތުންވެސް މަޝްވަރާކުރެވުނެވެ. މި ބައްދަލުކުރެއްވުމަކީ ދިވެހިރާއްޖެއާއި އިންޑިއާއާ ދެމެދު އޮތް ގާތް ގުޅުން އިތުރަށް ހަރުދަނާކުރުމަށް އެޅޭ އިތުރު ފިޔަވަޅެއްކަމުގައި ބެލެވެއެވެ.
Advertisement
މި ބައްދަލުކުރެއްވުމުގެ ސަބަބުން ދެ ޤައުމުގެ ދެމެދުގައި ހަކަތައިގެ ދާއިރާއިން އޮތް ގުޅުން އިތުރަށް ވަރުގަދަވެ، ކުރިމަގުގައި މި ދާއިރާއިން އިތުރު ކުރިއެރުންތަކެއް ލިބޭނެކަމަމަށް އުންމީދުކުރެވޭކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާ ބުނެފައިވެއެވެ.
