ވޯލްޑް ބޭންކުގެ މޯލްޑިވްސް ކަންޓްރީ ކްލައިމެޓް އެންޑް ޑިވެލޮޕްމަންޓް ރިޕޯޓު ލޯންޗްކޮށްފި

މާލޭގައި މިއަދު ބޭއްވުނު ވޯލްޑް ބޭންކުގެ މޯލްޑިވްސް ކަންޓްރީ ކްލައިމެޓް އެންޑް ޑިވެލޮޕްމަންޓް ރިޕޯޓު (ސީސީޑީއާރު) ގެ ލޯންޗިންގ އިވެންޓުގައި، މޫސުމަށް އަންނަ ބަދަލުތަކާ ކުރިމަތިލެވޭ ގޮތަށް ތަރައްޤީގެ މަސައްކަތްތައް އިސްކަންދީގެން ކުރިއަށް ގެންދިއުމުގެ މުހިންމުކަން މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ މިނިސްޓަރ ޠާރިޤު އިބްރާހީމް ފާހަގަ ކުރައްވައިފިއެވެ.

މިނިސްޓަރ ޠާރިޤު ދެއްކެވި ވާހަކަފުޅުގައި، ސީސީޑީއާރު ފަދަ މުހިންމު އިސްނެގުންތަކުގެ ތެރެއިން ދިވެހިރާއްޖެއަށް ވޯލްޑް ބޭންކުން ދެއްވާ އެހީތެރިކަމަށް ޝުކުރު އަދާކުރެއްވިއެވެ. އަދި މޫސުމަށް އަންނަ ބަދަލުތަކުގެ ސަބަބުން ދިވެހިރާއްޖެއަށް ކުރިމަތިވެފައިވާ ގޮންޖެހުންތަކާ ކުރިމަތިލުމަށް، ތަރައްޤީގެ މަޝްރޫޢުތައް ރޭވުމުގައި މޫސުމީ ބަދަލުތަކަށް ދެމެހެއްޓެނިވި ގޮތެއްގައި ތައްޔާރުވުމުގެ މުހިންމުކަން ވަރަށް ބޮޑަށް ފާހަގަކުރެއްވިއެވެ.

މި ރިޕޯޓަކީ ދިވެހިރާއްޖޭގެ ތަރައްޤީގެ މަސައްކަތްތަކާއި މޫސުމަށް އަންނަ ބަދަލުތަކާ ގުޅޭގޮތުން ސިޔާސަތު ކަނޑައަޅާ ފަރާތްތަކަށާއި، ތަރައްޤީގެ ދާއިރާގައި މަސައްކަތްކުރާ ފަރާތްތަކަށް މުހިންމު މަޢުލޫމާތުތަކެއް ފޯރުކޮށްދޭނެ ވަސީލަތެއްކަމަށް ބެލެވޭކަމަށާއި މި ރިޕޯޓުގެ ހޯދުންތަކުން ރާއްޖޭގެ ދުރު މުސްތަޤުބަލަށް ރޭވުމުގައި އެހީތެރިވެދޭނެ ކަމަށް އުއްމީދު ކުރައްވާ ކަމަށް ޠާރިޤު ވިދާޅުވިއެވެ.

މި އިވެންޓުގައި ވޯލްޑް ބޭންކުގެ އިސް ބޭފުޅުންނާއި، ސަރުކާރުގެ އެކި މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ. މި ރިޕޯޓަކީ ދިވެހިރާއްޖޭގެ މޫސުމީ ބަދަލުތަކާއި ތަރައްޤީގެ ދާއިރާގައި ހުރި ގޮންޖެހުންތަކާއި ފުރުޞަތުތައް ދެނެގަތުމަށް ތައްޔާރު ކޮށްފައިވާ މުހިންމު ދިރާސާއެކެވެ.

މި ރިޕޯޓުގެ ސަބަބުން ދިވެހިރާއްޖޭގެ ތަރައްޤީގެ މަސައްކަތްތައް މޫސުމީ ބަދަލުތަކަށް އަހުލުވެރި ގޮތެއްގައި ކުރިއަށް ގެންދިއުމަށް މަގުފަހިވެގެންދާނެއެވެ.