ޓީޗަރުންގެ ދުވަސް ފާހަގަކުރުމުގައި ޢަމަލުކުރާނެ ގޮތް އަންގައިފި

މިއަހަރުގެ ޓީޗަރުންގެ ދުވަސް ފާހަގަކުރުމުގައި ބެލެނިވެރިންގެ އަތުން ފައިސާ ނުނެގުމަށް އެޑިއުކޭޝަން މިނިސްޓްރީން ސްކޫލްތަކަށް އަންގައިފިއެވެ.

މިނިސްޓްރީން ސްކޫލްތަކަށް ފޮނުވި ސާކިއުލާއެއްގައި ވަނީ އޮކްޓޯބަރު 7 ގައި ފާހަގަކުރާ ޓީޗަރުންގެ ދުވަސް މިއަހަރު ފާހަގަކުރާނެ ގޮތުގެ އިރުޝާދުތައް ޙިއްސާކޮށްފައެވެ. އެގޮތުން މި އިރުޝާދުތަކުގައި ބުނެފައިވަނީ އަގުބޮޑު ހަފްލާތަކުގެ ބަދަލުގައި އުފެއްދުންތެރި އިލްމީ ހަރަކާތްތަކަށް އިސްކަން ދިނުމަށެވެ. އަދި ޓީޗަރުންގެ ދުވަސް އޮކްޓޯބަރު 6 އިން 10 އާ ދެމެދު ފާހަގަކުރުމަށާއި، ހަރަކާތްތައް އެއް ދުވަހެއްގެ ތެރޭގައި ނިންމުމަށް ވެސް ވަނީ އަންގާފައެވެ.

މީގެ އިތުރުން، ކޮންމެ ދަންފަޅިއެއްގައި ވެސް ހަރަކާތްތައް 45 މިނެޓަށްވުރެ ދިގު ނުކުރުމަށާއި، ރަސްމީ ސެޝަން ދެ ގަޑިއިރަށްވުރެ ދިގު ނުކުރުމަށް ވަނީ އަންގާފައެވެ. އަދި ރަށުން ބޭރުގައި ހަރަކާތްތައް ނުބޭއްވުމަށާއި، ދަރިވަރުންނާއި ބެލެނިވެރިން ވަކިވަކި ޓީޗަރުންނަށް ހަދިޔާ ނުދިނުމަށް ވެސް އިރުޝާދު ދީފައިވެއެވެ.

މިނިސްޓްރީން އަންގާފައިވަނީ ޓީޗަރުންގެ ގަދަރާއި ކަރާމާތަށް އުނިކަމެއް ނާންނާނެ ގޮތަކަށް މި ދުވަހުގެ ހަރަކާތްތައް ރާވައި ހިންގުމަށެވެ. މި އިރުޝާދުތަކާއެކު، މިއަހަރުގެ ޓީޗަރުންގެ ދުވަސް ކުރީގެ އަހަރުތަކާ ތަފާތުކޮށް ފާހަގަކުރެވޭނެ ކަމަށް ބެލެވެއެވެ.