"މައި އެޑިއު ޕޯޓަލް" އޮޓޮމޭޓްކުރުމުގެ މަސައްކަތް ފަށައިފި

މަތީ ތަޢުލީމު ހާސިލުކުރުމަށް ސަރުކާރުން ދޫކުރާ ލޯނު އަވަސްކުރުމަށްޓަކައި "މައި އެޑިއު ޕޯޓަލް" އޮޓޮމޭޓްކުރުމުގެ މަސައްކަތް ފަށައިފިއެވެ.

މި މަޝްރޫޢު ކުރިއަށްދަނީ ވޯލްޑް ބޭންކުގެ އެހީގައި ކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވަނީ މިއަދު ހާމަކޮށްފައެވެ.

އެ ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވި ގޮތުގައި، މި މަސައްކަތް ކުރުމަށް ޓެންޑަރަށް ހުޅުވާލައި، މިހާރު ވަނީ އެކަމަށް ޕާޓީއެއް ހޮވާފައެވެ. އަދި އަހަރެއްހާ ދުވަހުގެ ތެރޭގައި މި މަސައްކަތް ނިމޭނެ ކަމަށް އުއްމީދުކުރައްވާ ކަމަށް ނަޒީރު ވިދާޅުވިއެވެ.

މިހާރު ލޯނު ދޫކުރުމުގެ މަސައްކަތް ލަސްވަނީ ގިނަ ކަންކަން މެނުއަލްކޮށް ކުރަންޖެހޭތީ ކަމަށް ވުޒާރާއިން ފާހަގަކޮށްފައިވެއެވެ. މި އަހަރު މިހާތަނަށް 3,201 ދަރިވަރުންނަށް މަތީ ތަޢުލީމުގެ ފުރުސަތު ފަހިކޮށްދީފައިވާއިރު، ބޭރުގެ އެކި ޤައުމުތަކުގައި ކިޔަވަމުންދާ 10,595 ދަރިވަރުންގެ ފީތައްވެސް ޕްރޮސެސްކުރަމުންދާ ކަމަށް ވުޒާރާއިން ބުނެފައިވެއެވެ.

"މައި އެޑިއު ޕޯޓަލް" އޮޓޮމޭޓްކުރުމުން، ލޯނަށް އެދޭ ފޯމުތައް ޕްރޮސެސްކުރުމާއި، ދަރިވަރުންނާ މުޢާމަލާތްކުރުމުގެ މަސައްކަތް ފަސޭހަވެ، އަވަސްވެގެންދާނެ ކަމަށް ވުޒާރާއިން ބުންޏެވެ. މީގެ އިތުރުން، އޮޓޮމޭޓެޑް ފޯން ލައިނެއް ޤާއިމުކުރުމުން ދަރިވަރުންނަށް ގުޅޭނެ ލައިން އެންގޭޖްވުމާއި ކެނޑުމުގެ މައްސަލަ ހައްލުވާނެ ކަމަށްވެސް ވުޒާރާއިން ބުނެފައިވެއެވެ.

މީގެ އިތުރުން ޕޯޓަލް އަޕްގްރޭޑުކުރެވިގެން އަންނައިރު ލައިވް ޗެޓްކުރެވޭނެ އިންތިޒާމު ހަމަޖެހިގެންދާނެ ކަމަށް ވެސް ވުޒާރާއިން ވަނީ ބުނެފައެވެ. މިކަމުގެ ސަބަބުން އެއްފަހަރާ ގިނަ ދަރިވަރުން ހަޔަރ އެޑިއުކޭޝަނަށް ކުރާ އީމެއިލްތައް ނުފެނުމުގެ މައްސަލައާއި ދަރިވަރުން ކުރާ މެއިލްތަކަށް ޖަވާބު ނުލިބުމުގެ މައްސަލައަށްވެސް ޙައްލު ލިބޭނެ ކަމަށް އެ ވުޒާރާއިން ފާހަގަކޮށްފައިވެއެވެ.

އަދި ހަމައެއާއެކު، ލޯނު ދޫކުރުމުގެ މަސައްކަތްކުރާ މުއްދަތުގައި ވުޒާރާގެ މުވައްޒަފުން އުފުލާ ތަކުލީފުތަކާއި ލޯނު ފައިސާ ހަމަޖެހުން ލަސްވުމުގެ ސަބަބުން ދަރިވަރުންނަށް ދިމާވާ މައްސަލަތައްވެސް ހައްލުވާނެކަމަށް ވުޒާރާއިން ވަނީ ބުނެފައެވެ.

ނަޒީރު ވިދާޅުވި ގޮތުގައި، މި އައު ސިސްޓަމަކީ ދަރިވަރުންނަށާއި ވުޒާރާގެ މުވައްޒަފުންނަށް ވެސް ފަސޭހަވެގެންދާނެ ބަދަލެކެވެ. "މި ބަދަލާއެކު، ދަރިވަރުންނަށް ލޯނު ލިބުމުގައި ދިމާވާ ލަސްވުންތައް މަދުވެ، އަދި އަޅުގަނޑުމެންގެ މުވައްޒަފުންނަށްވެސް މަސައްކަތް ފަސޭހަވެގެންދާނެ. މިއީ ދެފަރާތަށްވެސް ފައިދާ ކުރާނެ ކަމެއް." ނަޒީރު ވިދާޅުވިއެވެ.