އޭލެވެލް އަށް ކިޔަވާ ދަރިވަރުންގެ އަދަދު މިދިޔަ އަހަރާ އަޅާބަލާއިރު %77 އިތުރުވެފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
މަތީ ސާނނަވީއަށް ކިޔަވާ ދަރިވަރުންގެ އަދަދު އިތުުރުކުރުމަށް ކުރެވުނު މަސައްކަތްތަކުގެ ތަފްސީލު އެޑިއުކޭޝަން މިނިސްޓްރީން ހާމަކޮށްފައިވާއިރު، އޭގެން ހާމަވާގޮތުގައި މިހާރު ރާއްޖޭގެ 23 ސްކޫލެއްގައި 3 މާއްދާއިން ނުވަތަ 2 މާއްދާއިން ފާސްވި ދަރިވަރުންނާއެކު، ގިނަ ދަރިވަރުންނަށް މަތީ ސާނަވީ ކިޔެވުމުގެ ފުރުޞަތު ފަހިކޮށްދީފައިވާކަމަށް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ މިގޮތަށް އަލަށް ހުޅުވާލި ފުރުޞަތާއެކު މި އަހަރު ސަރުކާރު ސްކޫލްތަކުގައި އަލަށް 2000 އަށް ވުރެ ގިނަ ދަރިވަރުން އޭލެވެލްއަށް ކިޔަވަމުން ދާކަމަށާއި މިއީ މިދިޔަ އަހަރާއި އަޅާބަލާއިރު %77 ގެ އިތުރުވުމެއް ކަމަށެވެ.
Advertisement
އެޑިއުކޭޝަން މިނިސްޓްރީން ބުނީ އަލަށް ކިޔަވައިދޭން ފެށި 23 ސްކޫލާއެކު މަތީ ސާނަވީއަށް ކިޔަވައިދޭ 45 ސަރުކާރު ސްކޫލް މިހާރު ރާއްޖޭގެ އެކި ހިސާބުތަކުގައި ޤާއިމްކުރެވިފައިވާ ކަމަށެވެ.
މީގެ ކުރިން ސަރުކާރުގެ ސްކޫލްތަކުގައި އޭލެވެލް އަށް ކިޔަވަން ފުރުޞަތު ދެމުން އައީ އޯލެވެލް އިމްތިހާނުގައި މަޖުބޫރު ހަތަރު މާއްދާއާއި އިތުރު އެއް މާއްދާއާއެކު ޖުމްލަ ފަސް މާއްދާއިން ދަށްވެގެން ސީ ފާސް ލިބިގެން ކަމަށެވެ.
އެޑިއުކޭޝަން މިނިސްޓްރީން މިހާރު ގެނެސްފައިވާ ބަދަލާއެކު ތިން މާއްދާއިން ފާސްވެފައިވާ ދަރިވަރުންނަށްވެސް އޭލެވެލް އަށް ވަނުމުގެ ފުރުޞަތު ވަނީ ފަހިވެފައެވެ.
އައު އުސޫލުގެ ދަށުން، ތިރީގައި ދަންނަވާފައިވާ ޝަރުތުތަކުގެ ތެރެއިން ކޮންމެވެސް އެއް ޝަރުތެއް ފުރިހަމަވާ ދަރިވަރުންނަށް އޭލެވެލް އަށް ވަނުމުގެ ފުރުޞަތު ލިބޭނެއެވެ.
- އޯލެވެލް އިމްތިހާނުގައި ދިވެހި ނުވަތަ އިސްލާމް މާއްދާއިން ދަށްވެގެން ސީ ފާހެއް ލިބުމާއެކު، ސައިންސް ނުވަތަ ބިޒްނަސް ސްޓްރީމުން މަދުވެގެން ދެ މާއްދާއިން ދަށްވެގެން ސީ ފާހެއް ލިބުމާއެކު، އިތުރު އެއް މާއްދާއިން ދަށްވެގެން ސީ ފާހެއް ހޯދުން.
- އޯލެވެލް އިމްތިހާނުގައި ތިން މާއްދާއިން ދަށްވެގެން ސީ ފާހެއް ލިބިފައިވުން.
- އިންޑިވިޖުއަލް އެޑިއުކޭޝަން ޕްލޭނެއްގެ ދަށުން (އައިއީޕީ) އިމްތިހާނު ހަދާ ދަރިވަރުން ނިންމާ އިމްތިހާނުގައި ބައިވެރިވި މާއްދާތަކުގެ ތެރެއިން ދެ މާއްދާއިން ދަށްވެގެން ސީ ފާހެއް ލިބިފައިވުން.
- ކުދިން ކިޔަވަން ބޭނުންވާ މާއްދާ ނުވަތަ މާއްދާތަކުން ސާނަވީ ނިންމައި އިމްތިހާނަކުން ދަށްވެގެން ސީ ފާހެއް ލިބިފައިވުން.
އެޑިއުކޭޝަން މިނިސްޓްރީން ބުނީ މި ބަދަލު ގެނެސްފައިވަނީ ސަރުކާރުގެ ސްކޫލްތަކުގައި ޖާގަ ހުރިނަމަ، ވީގާވެސް ގިނަ ދަރިވަރުންނަށް ފުރުޞަތު ދިނުމުގެ މަޤުޞަދުގައި ކަމަށެވެ. އަދި މިއީ ކުރިން ގްރޭޑް 11 އަދި 12 އަށް ވަދެވޭ ކްރައިޓީރިއާގެ އިތުރުން ގެނެސްފައިވާ ބަދަލެއް ކަމަށް މިނިސްޓްރީން ބުންޏެވެ.
