މޯލްޑިވްސް އިމިގްރޭޝަންގެ ނަމުގައި ދެ މީހަކު ގެތަކަށް ދާ މައްސަލައެއް ފެންމަތިވެއްޖެއެވެ.

މި މައްސަލަ ފެންމަތިވެފައިވަނީ އިމިގްރޭޝަންގެ ރެއިޑްގައި އުޅޭ ކަމަށް ބުނާ ބައެއްގެ ފޮޓޯ މީސް މީޑިއާގައި އާންމު ކުރަމުން އެއީ އިމިގްރޭޝަންގެ ބައެއްތޯ މީހަކު ސުވާލުކުރުމުންނެވެ. އެ ފޮޓޯއިން ދެ މީހަކު ފެންނަ އިރު އެ ދެ މީހުން ތިބީ ބިދޭސީން ދިިރިއުޅޭ ތަނެއްގައި ކަމަށް ބެލެވެއެވެ.

އެ ފޮޓޯގައިވާ ދެ މީހުންނާ ގުޅޭ ގޮތުން ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު ވިދާޅުވީ، އިމިގްރޭޝަންގެ ރެއިޑްތަކުގައި އޮފިސަރުންގެ އިމިގްރޭޝަން އައިޑީ ފެންނަ ގޮތަށް ހުންނާނެ ކަމަށެވެ. އަދި މިހާރުގެ އޮޕަރޭޝަންތަކަކީ ޔުނިފޯމް ލައިގެން ކުރިއަށްގެންދާ އޮޕަރޭޝަންތަކަކަށް ވާއިރު، ފޮޓޯއިން ފެންނަ ދެ ފަރާތަކީ އިމިގްރޭޝަނާ އެއްވެސް ގުޅުމެއް އޮންނަ ދެ ފަރާތެއް ނޫން ކަމަށް ޝަމްޢާން ވިދާޅުވިއެވެ.

ޝަމްޢާން ވިދާޅުވީ އެ ދެމީހުންގެ މައްސަލަ ފުލުހުން ބަލަމުން އަންނަ ކަމަށެވެ.

ދާދި ފަހުން ވަނީ އިމިގްރޭޝަންގެ ޔުނިފޯމުގައި ތިބި ބަޔަކު ރާއްޖޭގެ ރައްޔިތުންނަށް އަމާޒުކޮށްގެން ސައިބަރ ފޭރުމެއް ހިންގާކަމުގެ މައްސަލައެއްވެސް ފެންމަތިވެފައެވެ.

ރައްޔިތުންގެ ޒާތީ މަޢުލޫމާތާއި ބޭންކް އެކައުންޓްގެ ތަފްސީލު ހޯދުމަށް މި ފޭރުން ހިންގަނީ ޕާކިސްތާނުގެ ނަންބަރެއް ކަމަށްވާ 1077883 348 92+ އިން ވަޓްސްއެޕް ވީޑިއޯ ކޯލް މެދުވެރިކޮށެވެ. ވީޑިއޯ ކޯލްގައި ފެންނަނީ އިމިގްރޭޝަން ޔުނީފޯމު ލައިގެން، ފޭސް މާސްކު އަޅައިގެން ތިބޭ ބައެކެވެ. އެމީހުން ތިބޭ ތަނުގެ ފަހަތުގައި އިމިގްރޭޝަންގެ ބެކްޑްރޮޕެއް ވެސް ބަހައްޓާފައި ހުރެއެވެ.

މި މައްސަލައާ ގުޅިގެން ފުލުހުން ވަނީ ރައްޔިތުންނަށް އިރުޝާދުދީ، ބޭންކް އޮފް މޯލްޑިވްސް، އިމިގްރޭޝަން އަދި ފުލުހުން ވެސް ބޭރުގެ ނަންބަރަކުން މި ބާވަތުގެ މަޢުލޫމާތު ހޯދުމަށް ނުގުޅާނެ ކަމަށް ބުނެފައެވެ.