ހިޔާ ފްލެޓަކަށް ފިރިހެނުން ގެންގޮސް ފޭރުނު މައްސަލައިގައި ދެ މީހެއްގެ މައްޗަށް ދަޢުވާކުރަން ޕްރޮސެކިއުޓަރ ޖެނެރަލްގެ އޮފީހުން ނިންމައިފިއެވެ. މި މައްސަލައިގައި ތުހުމަތުކުރެވޭ ދެ މީހުންނަކީ ރިމާނާ މޫސާ (39) އާއި އަޙްމަދު މިހާދު (44) އެވެ.

މި މައްސަލަ އެ އޮފީހުން ބަލައިގަތީ މިދިޔަ ބުރާސްފަތި ދުވަހުކަމަށާއި އަދި 15 ދުވަހުގެ ތެރޭގައި ދަޢުވާ ކުރުމަށް ކޯޓަށް ފޮނުވާނެ ކަމަށްވެސް ޕީޖީ އޮފީހުން ބުނެފައިވެއެވެ.

މި މައްސަލައިގައި ގާތްގަނޑަކަށް 48،000 ރުފިޔާގެ ފޭރުމުގެ މައްސަލަތަކެއް ހިމެނޭ ކަމަށް ޕީޖީ އޮފީހުން ހާމަކޮށްފައިވެއެވެ.

މިފަދަ މައްސަލަތަކާ ގުޅިގެން، ރައްޔިތުން ސަމާލުވުމަށް މޯލްޑިވްސް ޕޮލިސް ސަރވިސްއިން އިލްތިމާސްކޮށްފައިވެއެވެ.ފަދަ ހާދިސާތަކުން ރައްކާތެރިވުމަށްޓަކައި ރޭގަނޑުގެ ވަގުތުތަކުގައި އެކަނި ނުއުޅުމަށާއި، ޝައްކުކުރެވޭ ފަދަ ކަމެއް ފެނިއްޖެނަމަ ވަގުތުން ފުލުހުންނަށް އެންގުމަށް އެފަރާތުން އިރުޝާދު ދެއެވެ.