2022–2023 ވަނަ އަހަރުގެ "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތު މިއަދު ދަރުބާރުގޭގައި ފެށިއްޖެއެވެ. މި ރަސްމިއްޔާތު ކުރިއަށްދަނީ 3 ދަންފަޅިއަށް ބަހާލައިގެންނެވެ.
ހުރިހާ ދަންފަޅިއެއްގައިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަންނަވާ ގޮތަށް ވަނީ ހަމަޖެހިފައެވެ.
މިއަދު ހެނދުނު ބޭއްވުނު ފުރަތަމަ ދަންފަޅީގައި 131 ދަރިވަރަކަށް 133 އެވޯޑް ވަނީ ދީފައެވެ. މީގެ ތެރޭގައި މަތީ ޘާނަވީ ތަޢުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ޤައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ދިނުން ހިމެނެއެވެ. މި އެވޯޑުތައް ހަވާލުކޮށްދެއްވީ ރައީސުލްޖުމްހޫރިއްޔާ އަމިއްލަފުޅަށެވެ.
Advertisement
ތަޢުލީމީ ވުޒާރާއިން މަޢުލޫމާތު ދެއްވާފައިވާ ގޮތުގައި، މިދިޔަ އަހަރުގެ ޘާނަވީ އަދި މަތީ ޘާނަވީ އިމްތިހާނުތަކުން އެންމެ ރަނގަޅު ނަތީޖާ ހާސިލްކުރި ޖުމްލަ 441 ދަރިވަރަކަށް މި ރަސްމިއްޔާތުގެ އެކި ދަންފަޅިތަކުގައި އިނާމު ދެވޭނެއެވެ. މީގެ ތެރޭގައި ޤައުމީ ގަދަ 10 ގައި ހިމެނޭ 376 ދަރިވަރުންނާއި، ދުނިޔޭގެ ފެންވަރުގައި މަތީ ވަނަ ހޯދި ދަރިވަރުން ހިމެނެއެވެ.
މި ރަސްމިއްޔާތުގައި ދަޢުލަތުގެ ބައެއް ވަޒީރުންނާއި ކަމާގުޅުންހުރި ދާއިރާތަކުގެ އިސްވެރިންގެ އިތުރުން އިނާމު ލިބޭ ދަރިވަރުންގެ ބެލެނިވެރިން ބައިވެރިވެލެއްވިއެވެ.
ފުރަތަމަ ދަންފަޅީގައި ތަޢުލީމީ ވުޒާރާގެ ފަރާތުން ރައީސުލްޖުމްހޫރިއްޔާއަށް ވަނީ ހަނދާނީ ފިލައެއް ވެސް އަރުވާފައެވެ.
