މެލޭޝިއާ ސަރުކާރުން ދިވެހި ދަރިވަރުންނަށް 561 ސްކޮލަރޝިޕް ދިނުމަށް އެއްބަސްވެއްޖެއެވެ. މި ސްކޮލަރޝިޕްތަކަކީ ތަފާތު ދާއިރާތަކުން މަތީ ތަޢުލީމު ހާސިލުކުރުމަށް ދެވޭ ފުރުސަތުތަކެކެވެ.
ހަޔަރ އެޑިއުކޭޝަން މިނިސްޓްރީގައި މިއަދު ބޭއްވި ރަސްމިއްޔާތެއްގައި މި އެއްބަސްވުމުގައި ސޮއިކޮށްފައިވަނީ އެޑިޔުކޭޝަން މެލޭޝިއާ ގްލޯބަލް ސާވިސް އާ އެކުގައެވެ.
މި ސްކޮލަރޝިޕްތަކުގެ ތެރެއިން އެންމެ ގިނަ ފުރުސަތު ދެވިފައިވަނީ ސޯޝަލް ސައިންސަސް އެންޑް މެނޭޖްމަންޓް ދާއިރާއަށެވެ. މި ދާއިރާއަށް 255 ސްކޮލަޝިޕް ލިބޭނެއެވެ. ދެވަނައަށް އެންމެ ގިނަ ފުރުސަތު ދެވިފައިވަނީ އިންޖިނިއަރިންގ އެންޑް ޓެކްނޮލޮޖީ ދާއިރާއަށް ކަމަށްވާއިރު، މި ދާއިރާއަށް 150 ސްކޮލަރޝިޕް ލިބޭނެއެވެ. މީގެ އިތުރުން، އާޓްސް އެންޑް ހިއުމެނިޓީސް ދާއިރާއަށް 75 ސްކޮލަރޝިޕް އަދި ލައިފް ސައިންސަސް އެންޑް މެޑިސިން ދާއިރާއަށް 63 ސްކޮލަރޝިޕް ލިބޭނެއެވެ. އަދި އެހެނިހެން ދާއިރާތަކަށް 18 ސްކޮލަރޝިޕް ދެވޭނެއެވެ.
Advertisement
މި އެއްބަސްވުމުގެ ދަށުން، ސްކޮލަރޝިޕް ލިބޭ ދަރިވަރުންނަށް ކޯސް ފީގެ އިތުރުން ވިސާ އަދި އިދާރީ ކަންކަމުގައި ލުއިފަސޭހަކަން ލިބޭނެކަމަށް ވަނީ ހާމަކޮށްފައެވެ. މިއީ ދިވެހި ދަރިވަރުންނަށް މެލޭޝިއާގައި ކިޔެވުމަށް އިތުރު ފުރުސަތުތަކެއް ހުޅުވިގެންދާނެ ކަމެކެވެ.
އެގޮތުން، މިހާރުވެސް 1700 އަށްވުރެ ގިނަ ދިވެހި ދަރިވަރުން މެލޭޝިއާގައި ކިޔަވަމުންދާކަން ފާހަގަކުރެވެއެވެ. މި އައު އެއްބަސްވުމާއެކު، މެލޭޝިއާގައި ކިޔަވާ ދިވެހި ދަރިވަރުންގެ އަދަދު އިތުރަށް އިތުރުވާނެ ކަމަށް މިނިސްޓްރީން ބުނެފައިވެއެވެ.
މި ސްކޮލަރޝިޕް ފުރުސަތުތަކަކީ ދިވެހި ދަރިވަރުންނަށް މަތީ ތަޢުލީމު ހާސިލުކުރުމަށް ލިބޭ މުހިންމު ފުރުސަތެއް ކަމަށްވާއިރު، މިކަމުގެ ސަބަބުން ދެ ޤައުމުގެ ދެމެދުގައި އޮންނަ ގުޅުން އިތުރަށް ބަދަހިވެގެންދާނެކަމަށް ހަޔަރ އެޑިއުކޭޝަން މިނިސްޓްރީން ބުންޏެވެ.
