އޭލެވެލް ޓޮޕް ޓެން ޖަލްސާ ބުރާސްފަތި ދުވަހު ބާއްވަނީ

އޭލެވެލް ޓޮޕް ޓެން ޖަލްސާ މި ޙަފްތާގެ ބުރާސްފަތި ދުވަހު ބޭއްވުމަށް އެޑިއުކޭޝަން މިނިސްޓްރީން ނިންމައިފިއެވެ.

445 ދަރިވަރުންނާއެކު ދަރުބާރުގޭގައި ބާއްވާ "މަތީ އަރުތަވެރިންގެ އިނާމު" ޙަފްލާގައި އިނާމު ދޭނީ 2022-2023 ގެ މެއި/ޖޫން އިމްތިޙާނު ހެދި ދަރިވަރުންގެ ތެރެއިން އެންމެ ރަނގަޅު ނަތީޖާ ހޯދި ދަރިވަރުންނަށް ކަމަށް މިނިސްޓްރީން ބުންޏެވެ.

މިނިސްޓްރީން ބުނީ މި ޖަލްސާ ކުރިއަށްދާނީ ތިން ދަންފަޅިއަކަށް ބަހާލައިގެން ކަމަށެވެ. އެގޮތުން ބުރާސްފަތު ދުވަހުގެ ހެނދުނު 8:30 ގައި ފުރަތަމަ ދަންފަޅި، މެންދުރު 13:00 ގައި ދެވަނަ ދަންފަޅި އަދި ރޭގަނޑު 20:00 ގައި ތިންވަނަ ދަންފަޅި ބޭއްވުމަށް ނިންމާފައިވާ ކަމަށް މިނިސްޓްރީން ބުންޏެވެ.

2022-2023 ވަނަ ދިރާސީ އަހަރު ރާއްޖޭގައި 2849 ދަރިވަރުން މަތީ ސާނަވީ އިމްތިޙާނު ފުރިހަމަކޮށްފައިވާއިރު، އޭގެ ތެރެއިން 445 ދަރިވަރުން ވަނީ މުޅި ރާއްޖެއިން ޓޮޕް ޓެން ހާސިލުކޮށްފައެވެ. އަދި ވަކި ވަކި މާއްދާއިން 20 ދަރިވަރަކު ވަނީ ދުނިޔޭގެ އެންމެ މޮޅު ނަތީޖާ ހޯދާފައެވެ.

އޭލެވެލް ޓޮޕް 10ގެ 1 ވަނަ 16 ދަރިވަރަކު ހޯދާފައިވާއިރު އޭގެ ތެރޭގައި ހިމެނެނީ ވިލާ އިންޓަރނޭޝަނަލް ހައި ސްކޫލްގެ 6 ދަރިވަރުންނާއި ސީއެޗްއެސްސީގެ 6 ދަރިވަރުންނާއި އަހުމަދިއްޔާ އިންޓަރނޭޝަނަލް ސްކޫލްގެ 4 ދަރިވަރުންނެވެ.

މި ޖަލްސާގައި ދުނިޔޭގެ ފެންވަރުގެ ވަނަތައް ހޯދި ދަރިވަރުންނަށްވެސް އިނާމު ދިނުމަށް ވަނީ ހަމަޖެހިފައެވެ.