ގޭބިސީތަކުގައި ގެންގުޅޭ ޖަނަވާރުތަކަށް ބޭނުންވާ ބޭސްފަރުވާއާއި ވެކްސިންފަދަ ތަކެތި، ހެޔޮއަގެއްގައި އަދި ފަސޭހައިން ލިބޭނެ މަގު ތަނަވަސްކުރުމަށް މަސައްކަތްކުރައްވަމުން ގެންދަވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމީލާ ވިދާޅުވެއްޖެއެވެ.
ރަމީލާ ވިދާޅުވީ ވެޓެރިނަރީ ޚިދުމަތް ފުޅާކުރުމަށް ކްލިނިކްތައް ޤާއިމްކުރުމާއި ޚާއްޞަ ޑޮކްޓަރުންނާއި ނަރުހުން ރާއްޖެ ގެނައުމުގެ މަސައްކަތް ކުރިއަށްދާކަމަށެވެ. އަދި ޖަނަވާރުތަކަށް ބޭނުންވާ ބޭސްފަރުވާ ރާއްޖެއިން ލިބެން ނެތްކަންވެސް ރަމީލާ ފާހަގަކުރެއްވިއެވެ.
ރަމީލާ ވިދާޅުވީ ޖަނަވާރުތަކަށް ރައްކާތެރި އަދި ހެޔޮއަގެއްގައި ބޭހާއި ފަރުވާގެ އާލާތްތައް ލިބޭނެގޮތް ހެދުމަށް އެސްޓީއޯ އަދި އެމްއެފެފްޑީއޭ އާއެކު މަޝްވަރާކުރެވިފައިވާކަމަށެވެ. މީގެ އިތުރުން، ޖަނަވާރާބެހޭ ޤާނޫނެއްގެ ޑްރާފްޓް އެކުލަވާލައި ބަންޑާރަ ނައިބުގެ އޮފީހަށް ހުށަހަޅާފައިވާކަމަށާއި، ޕެޓް ޝޮޕްތަކުގެ އިންސްޕެކްޝަން ހިންގަމުންދާކަމަށްވެސް ރަމީލާ ފާހަގަކުރެއްވިއެވެ.
Advertisement
މި މަސައްކަތްތަކުގެ ނަތީޖާއެއްގެ ގޮތުން، ކުރިއަށް އޮތް ތަނުގައި ރާއްޖޭގައި ގެންގުޅޭ ޖަނަވާރުތަކަށް ބޭނުންވާ ޞިއްޙީ ފަރުވާ ފަސޭހަކަމާއެކު ލިބޭނެކަމަށް އުއްމީދުކުރައްވާކަމަށް ރަމީލާ ވިދާޅުވިއެވެ.
