ވަރަށް ބޮޑު މަރާމާތަކަށް ފަހު މާލޭގައި ހުންނަ އާސަހަރާ މިސްކިތުގެ ތިރީބައި ހުޅުވައިފިއެވެ.
މި މިސްކިތް އަލުން ހުޅުވާފައިވަނީ މިއަދުގެ ހުކުރު ނަމާދަށެވެ.
މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވީ މި ހިނގާ ސެޕްޓެމްބަރު މަސް ނިމުމުގެ ކުރިން އާސަހަރާ މިސްކިތުގެ މަތީ ބަޔާއެކު އެއްކޮށް ނިމި، ކުރިއެކޭވެސް އެއްފަދައިން މާލޭގައި ނިޔާވާ މީހުންގެ ޖަނާޒާގެ ކަންތައްތައް އާސަހަރާގައި ބޭއްވުމަށް ހަމަޖެހިގެންދާނެ ކަމަށެވެ. އަދި މާލޭގައި ނިޔާވާ މީހުންގެ ޖަނާޒާތައް ބޭއްވުމަށް ހުޅުމާލެއަށް މިހާރު ދާން ޖެހުމުގެ ސަބަބުން ރައްޔިތުންނަށް ދިމާވެފައިވާ އުނދަގޫތަކަށް މިކަމުގެ ސަބަބުން ނިމުމެއް އަންނާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އާސަހަރާ މިސްކިތް އެއްކޮށް މަރާމާތުކޮށް ނިމޭއިރު މީހުން ހިނެވުމަށް 4 ތަނެއް ހުންނާނެ ކަމަށާއި ނަމާދުކުރާ ސަރަޙައްދާއި މަޑުކޮށްލައިގެން ތިބޭ ސަރަޙައްދުވެސް އޭސީކޮށްފައިވާ ކަމަށެވެ. އަދި މަސައްކަތް އެއްކޮށް ނިމޭއިރު އުމުރުން ދުވަސްވީ މީހުންނަށާއި ނުކުޅެދުންތެރިކަން ހުންނަ ފަރާތްތަކަށް ޚާއްސަ ފާޚާނާއާއެކު އެ ފަރާތްތަކަށް ފަސޭހަކަމާއެކު ސަހަރާތެރޭގައި އުޅެވޭނެ އިންތިޒާމް ހަމަޖެހިގެންދާނެ ކަމަށް އާޒިމް ވިދާޅުވިއެވެ.
އާސަހަރާ އެއްކޮށް ނިމޭއިރު ގާތްގަނޑަކަށް 3200 އަކަފޫޓަށް ބޮޑުކުރެވޭނެ ކަމަށް މާލެ ސިޓީ ކައުންސިލުން މީގެ ކުރިން ވަނީ ބުނެފައެވެ.
މާލެ ސިޓީ ކައުންސިލުން ބުނެފައިވަނީ އާސަހަރާ މަރާމާތުކުރުމުގެ މުޅި މަޝްރޫޢަށް 11.6 މިލިއަން ރުފިޔާ ހޭދަވާކަމަށެވެ.
