ރާއްޖޭގައި އުޅޭ ބިދޭސީން އުޅެނީ ޤަވާޢިދުގެ ތެރެއިންތޯ ބެލޭނެ އެޕްލިކޭޝަނެއް ތައާރަފްކުރުމުގެ މަސައްކަތް އިމިގްރޭޝަނުން ފަށައިފިއެވެ.

ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވީ ބިދޭސީ މީހާ އުޅެނީ ޤަވާޢިދުގެ ތެރެއިންތޯ މި އެޕްލިކޭޝަންގެ ޒަރިއްޔާއިން އިމިްގްރޭޝަން އޮފިސަރުންނަށް ބަލާލެވޭނެ ކަމަށާއި މިއީ އިމިގްރޭޝަންގެ ޚިދުމްތަތަކަށް ޒަމާނީ ބޮޑެތި ބަދަލުތަކެއް ގެނައުމުގެ މަސައްކަތުގެ ދަށުން ކުރެވޭ މަސައްކަތެއް ކަމަށެވެ.

ޝަމްޢާން ވިދާޅުވީ މީގެ ކުރިން އިމިގްރޭޝަނުން މި މަސައްކަތް ކުރަމުން އައީ މެނުއަލްކޮށް ކަމަށާއި އެކަން ބަދަލުކޮށް، ޒަމާނާ އެއްގޮތަށް މަސައްކަތް ޑިޖިޓަލައިޒްކުރުމުގެ މަސައްކަތް ކުރައްވަމުން ގެންދަވާ ކަމަށެވެ. އަދި "އިމިގްރޭޝަން ވޮޗް" އަކީވެސް މީގެ ބައެއް ކަމަށް ޝަމްޢާން ވިދާޅުވިއެވެ.

ޤަވާޢިދާ ޚިލާފަށް އުޅޭ ބިދޭސީންގެ މައްސަލަ ރިޕޯޓުކުރުމަށް "އިމިގްރޭޝަން ވޮޗް" އޮންލައިން ޕްލެޓްފޯމް އިމިގްރޭޝަނުން ތައާރަފްކޮށްފައިވަނީ މިދިޔަ ޖުލައި މަހުގެ 17 ގައެވެ. މި ޕްލެޓްފޯމް މެދުވެރިކޮށް ލިބޭ މައްސަލަތައް ބަލައި، ޤަވާޢިދާ ޚިލާފަށް އުޅޭ ބިދޭސީންނާމެދު އިމިގްރޭޝަނުން އަންނަނީ ފިޔަވަޅު އަޅަމުންނެވެ.

އިމިގްރޭޝަނުން ދާދި ފަހުން ބުނެފައިވަނީ މި އަހަރު އެކި މައްސަލަތަކުގައި 3300 އަށް ވުރެ ގިނަ ބިދޭސީން ޑީޕޯޓުކޮށްލާފައިވާ ކަމަށެވެ. އޭގެ ތެރޭގައި ރާއްޖޭގައި ޤަވާޢިދާ ޚިލާފަށް ވިޔަފާރިތައް ހިންގާ މީހުންނާއި، ލިޔެކިޔުންތައް ފުރިހަމަ ނޫން މީހުން ހިމެނެއެވެ.

ސަރުކާރުގެ އަމާޒަކީ ބިދޭސީންގެ މައްސަލައަށް 3 އަހަރުތެރޭ ފުރިހަމައަށް ޙައްލު ގެނައުމެވެ.