އިޒްރޭލުގައި ބޭއްވުނު އާންމު އިންތިހާބުގެ ވޯޓު ގުނުން ކުރިއަށްދާއިރު، އެންމެ ފުރަތަމަ ނެރުނު އެގްޒިޓް ޕޯލްތަކާ ހިލާފަށް ބެންޖަމިން ނަތަންޔާހޫ ކުރިއެރުން ހޯދަމުންދާ ކަމަށް ރިޕޯޓުތައް ބުނެފިއެވެ.
މިހާތަނަށް ވޯޓުލީ މީހުންގެ ގާތްގަނޑަކަށް 55 އިންސައްތަ ވޯޓު ގުނާ ނިމިފައިވާއިރު، އިޒްރޭލުގެ މީޑިއާތަކުން ލަފާކުރާ ގޮތުގައި ކޮންމެ ފަސް ވޯޓުލީ މީހަކުން އެކަކު ވޯޓު ދީފައިވަނީ ނަތަންޔާހޫ އިސްވެ ހުރި ފަޅިއަށެވެ. އެގޮތުން، އިންތިހާބުގެ ކުރީކޮޅު ނެރުނު އެގްޒިޓް ޕޯލްތަކުން ނަތަންޔާހޫގެ ހައްދުފަހަނައެޅި ކަނާތުފިޔައިގެ ބްލޮކަށް ނާކާމިޔާބީއާ ކުރިމަތިލާންޖެހޭނެ ކަމަށް ދެއްކި ނަމަވެސް، މިހާރުގެ ލަފާކުރުންތަކުން ދައްކަނީ އޭނާގެ ފަޅިން 56 ގޮނޑި ކާމިޔާބު ކުރާނެ ކަމަށެވެ.
ކުރިއަށް އޮތް މަދު ގަޑިއިރުތަކުގެ ތެރޭގައި އިންތިހާބުގެ ދާއިމީ ނަތީޖާ އިއުލާނު ކުރާނެ ކަމަށް ބެލެވެއެވެ. ސަރުކާރެއް އެކުލަވާލުމަށްޓަކައި ޕާލަމެންޓުގެ އަގުލަބިއްޔަތު ހޯދުމަށް ދެ ފަޅިން ވެސް އެހެން ކުދި ޕާޓީތަކާއެކު ކޯލިޝަން ހެދުމުގެ މަސައްކަތް ފަށާނީ ދާއިމީ ނަތީޖާ ލިބުމުންނެވެ.
Advertisement
މި ދަނޑިވަޅުގައި، ޔުނައިޓެޑް އަރަބް ލިސްޓް (ރާމް) ގެ ލީޑަރު މަންސޫރު އައްބާސް ހާމަކުރައްވާފައިވާ ގޮތުގައި، ކޯލިޝަން ހެދުމާ ގުޅޭގޮތުން ތަފާތު ފަރާތްތަކުން އޭނާއަށް އަންނަނީ ގުޅަމުންނެވެ. އޭގެ ތެރޭގައި އައިޒެންކޮޓްގެ ފަޅީގެ އިތުރުން ނަތަންޔާހޫގެ ލިކޫޑް ޕާޓީ ވެސް ހިމެނޭ ކަމަށް އޭނާ ވިދާޅުވިއެވެ.
މި ނަތީޖާތަކާއެކު، ކުރިއަށް އޮތް ވަގުތުތަކުގައި އިޒްރޭލުގެ އާ ސަރުކާރެއް އެކުލަވާލުމުގެ މަޝްވަރާތައް ވަރަށް ބޮޑަށް ހޫނުވެގެންދާނެ ކަމަށް ބެލެވެއެވެ.
