އިސްރާއީލުން ޣައްޒާއަށް ދެމުންގެންދާ އަނިޔާވެރި ޢުދުވާނުގައި ޣައްޒާ ސިޓީގެ އަލް-ތާޖު ސަރަހައްދަށް ބޮންއަޅައި ސުންނާފަތިކޮށްލި ބްލޮކްގެ ކުނިތަކުގެ ދަށުން ފެނުނު 105 ޝަހީދެއްގެ ހަށިގަނޑު ފަސްދާނުލުމުގެ ރަސްމިއްޔާތު ޣައްޒާގައި ބާއްވައިފިއެވެ.
ޣައްޒާގެ މަދަނީ ދިފާއީ ބާރުތަކުން 17 ދުވަހުގެ ބުރަ މަސައްކަތުން ނެރުނު މި ހަށިތަކުގެ ވަދާއީ ޖަނާޒާ ކުރިއަށްދިޔައީ އާއިލާތަކުގެ ވަރަށް އަސަރުގަދަ ރުއިންތަކާއެކުގައެވެ. އިސްލާމީ އުސޫލުތަކާ އެއްގޮތަށް މި ޝަހީދުންގެ ހަށިތައް މިހާރު ވަނީ އެއްކޮށް ފަސްދާނުލައި ނިންމާފައެވެ.
މި ހިތާމަވެރި ހާދިސާ ހިނގާފައިވަނީ 2023 ވަނަ އަހަރުގެ އޮކްޓޫބަރު މަހުގެ ތެރޭގައި އިސްރާއީލުން ބަރު ބޮންތަކެއް ބޭނުންކޮށްގެން އަލް-ތާޖު ރެސިޑެންޝަލް ބްލޮކަށް ދިން ވަރުގަދަ ހަމަލާތަކެއްގައެވެ. އެ ސަރަހައްދުގައި ދިރިއުޅެމުންދިޔަ އަދި ރައްކާތެރިކަން ހޯދަން ވަދެތިބި އާންމުންގެ ތެރެއިން 300 އަށްވުރެ ގިނަ މީހުން އެދުވަހު ޝަހީދުވިއެވެ. ނަމަވެސް ބޯމަތިން ބޮން އަޅަމުންދިއުމާއި، އިމާރާތްތަކުގެ ކުނިތައް ނަގާނެ ބޮޑެތި މެޝިނަރީތައް ނެތުމުގެ ސަބަބުން ގިނަ ބައެއްގެ ހަށިތައް ނުނެގި ތިން އަހަރާ ގާތްވަންދެން ބިމުގެ އަޑީގައި ތާށިވެފައި ހުއްޓެވެ.
Advertisement
މަދަނީ ދިފާއީ ބާރުތަކުން ހާމަކުރި ގޮތުގައި، މިހާރު ވަޅުލި 105 ހަށިގަނޑަކީ އެ ސަރަހައްދުން ނެގުނު ބައެއް ކަމަށާއި، އަދިވެސް ގިނަ ބައެއްގެ ހަށިތައް ނުވަތަ ކަށިތައް އެ ސުންނާފަތިވެފައިވާ އިމާރާތްތަކުގެ ދަށުގައި ވާނެ ކަމަށް ބެލެވެއެވެ.
