ގޫގަލްގެ އޭއައި މޮޑެލް ކަމަށްވާ ޖެމިނައި، ސައިބަރ ސެކިއުރިޓީ ޓެސްޓެއްގެ ތެރެއިން އަމިއްލައަށް މަސައްކަތް ކޮށްގެން އަސްލު ތިން ކުންފުންޏަކަށް ވަދެ ހެކް ކޮށްލާފައިވާ ކަމަށް ގޫގަލްއިން ހާމަކޮށްފިއެވެ. މި ހާދިސާ ހިނގާފައިވަނީ މެއި މަހު ސައިބަރ ސެކިއުރިޓީ ކުންފުންޏެއް ކަމަށްވާ "އިރެގިއުލަރ" އިން ކުރިއަށް ގެންދިޔަ ޓެސްޓެއްގެ ތެރެއިންނެވެ.

މި މައްސަލަތައް ދިމާވީ، ފިކްޝަނަލް ނުވަތަ ހިޔާލީ ކުންފުންޏެއްގެ މައުލޫމާތު ހޯދުމަށް މަސައްކަތްކުރަމުން ދިޔަ ވަގުތު ޖެމިނައިއަށް އިންޓަނެޓްގެ ނުބައި އެކްސެސްއެއް ލިބުމުގެ ސަބަބުންނެވެ. މީގެ ތެރެއިން އެއް ހާދިސާގައި، އަސްލު ކުންފުންޏެއްގެ ހިދުމަތްތަކަށް ވަނުމަށްޓަކައި ޖެމިނައިއިން ވަނީ ޕާސްވޯޑްތައް ދިމާކޮށްގެން އެ ސަރވިސްއަށް ވަދެފައެވެ. އަދި އަނެއް ދެ ހާދިސާގައި، އިންޓަނެޓުން އާންމުކޮށް ފެންނަން ހުރި މައުލޫމާތާއި ކްރެޑެންޝަލްތައް ބޭނުންކޮށްގެން، އެއީ ޓެސްޓްގެ ބައެއް ކަމަށް ހީކޮށް ވެބްސައިޓްތަކަށް ވަދެފައިވެއެވެ.

ގޫގަލްގެ ސެކިއުރިޓީ އިންޖިނިއަރިންގ ގެ ނައިބު ރައީސް ހެދާ އެޑްކިންސް ވިދާޅުވިގޮތުގައި، މި ތިން ފަހަރުވެސް ޖެމިނައިއަށް ކަމެއް ގޯސްވެގެން އުޅޭކަން ވިސްނި، އެ ހަމަލާތައް ފުރިހަމަ ކުރުމުގެ ކުރިން އަމިއްލައަށް ހުއްޓާލާފައިވެއެވެ. އަދި މިއީ އޭއައި މޮޑެލް މަގުން ކައްސާލުން ދައްކުވައިދޭ ކަމެއް ނޫން ކަމަށާއި، އޭގެ ސޭފްޓީ މެޝަރތައް ރަނގަޅަށް މަސައްކަތްކުރިކަން ހާމަވާ ކަމެއް ކަމަށް ގޫގަލްއިން ބުނެއެވެ.

ނަމަވެސް، މިއީ ކޮންޓްރޯލް ކުރެވިފައިވާ މާހައުލަކުން ބޭރަށް އޭއައި މޮޑެލްތައް ނުކުމެ، އަމިއްލަ އިހްތިޔާރުގައި މިފަދަ ކަންކަން ކުރުމުގެ ކަންބޮޑުވުންތައް އިތުރުވަމުންދާ ކަމެކެވެ. މީގެ ކުރިން އެންތްރޮޕިކް، އޯޕަންއޭއައި އަދި މެޓާގެ އޭއައި މޮޑެލްތަކުންވެސް މިފަދަ ކަންކަން ފެނިފައިވާކަން ފާހަގަކުރެވެއެވެ. މީގެ ތެރެއިން އެންތްރޮޕިކްގެ ކްލޯޑް މޮޑެލް، އަސްލު ނިޒާމުތަކަށް ވަނުމަށްފަހުވެސް ހަމަލާ ކުރިއަށް ގެންގޮސްފައިވާކަން ފާހަގަކޮށްފައިވެއެވެ.