ކުރިއަށްއޮތް މަދު އަހަރުތަކެއްގެ ތެރޭގައި ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްއަށްވުރެ އިތުރުވާނެކަމަށް ބެލެވޭތީ، މިހާރު އިސްކަންދޭންޖެހެނީ ހޫނުމިން މައްޗަށްދާ މިންވަރާއި އަދި މަތީގައި ހުންނަ މުއްދަތު ކުޑަކުރުމަށްކަމަށް އދ. އިން ބުނެފިއެވެ.

އދ. ގެ އެންވަޔަރަންމަންޓް ޕްރޮގްރާމް (ޔޫއެންއީޕީ) އިން ނެރުނު އާ ރިޕޯޓެއްގައިވާ ގޮތުން، ބޯޓުދެއްޔާއި ތެލާއި ގޭސް އެންދުމުގެ ސަބަބުން ޖައްވަށް ދޫކުރާ ނުރައްކާތެރި ގޭސްތައް މަދުކުރެވިފައި ނުވާތީ، 2015 ވަނަ އަހަރުގެ ޕެރިސް ކްލައިމެޓް އެގްރީމަންޓުގައި ކަނޑައެޅި 1.5 ޑިގްރީގެ އިމަށްވުރެ ދުނިޔޭގެ ފިނިހޫނުމިން މައްޗަށް ދިޔުން މިހާރު ވަނީ ޔަގީންވެފައެވެ.

އެ ރިޕޯޓުގައި ބުނެފައިވަނީ، މިހާރު ދުނިޔޭގެ ގައުމުތަކުން އަމަލުކުރަމުންދާ ސިޔާސަތުތަކަށް ބަލާއިރު 2100 ވަނަ އަހަރާ ހަމައަށްދާއިރު ދުނިޔޭގެ ފިނިހޫނުމިން 2.6 ޑިގްރީ ސެލްސިއަސްއަށް އުފުލުން އެކަށީގެންވާ ކަމަށެވެ. ނަމަވެސް، މޫސުމީ ބަދަލުތަކާ ދެކޮޅަށް ވަރުގަދަ ފިޔަވަޅުތަކެއް އަޅައިފިނަމަ، ހޫނުމިން 1.8 ޑިގްރީގައި ހިފެހެއްޓުމަށްފަހު މަޑުމަޑުން ދަށްކުރެވިދާކަމަށްވެސް ރިޕޯޓުގައި ބުނެފައިވެއެވެ.

އދ. އިން ބުނާ ގޮތުގައި، ގިނަ އަހަރުތަކެއް ވަންދެން ފިނިހޫނުމިން މަތީގައި ހުރެއްޖެނަމަ، ނުރައްކާތެރި ތޫފާންތަކާއި، ކަނޑުގެ ލޮނުގަނޑު އުފުލުމާއި، ކާބޯތަކެއްޗާއި ފެނުގެ ދަތިކަން ކުރިމަތިވުމުގެ އިތުރުން ސިއްހީ ގޮތުން ބޮޑެތި ނުރައްކާތަކާ ކުރިމަތިވާނެއެވެ. އަދި ގަނޑުފެން ފަރުބަދަތައް ވިރިގެންދިއުމާއި އެމެޒޯން ޖަންގަލިތަކަށް ލިބޭ ގެއްލުންތައް ފަދަ އިއާދަނުކުރެވޭނެ ބޮޑެތި ކާރިސާތަކާ މުޅި ދުނިޔެ ކުރިމަތިލާންޖެހިދާނެއެވެ.

ސައިންސްވެރިން ބުނާގޮތުގައި 1.5 ޑިގްރީގެ އިމަށްވުރެ ފިނިހޫނުމިން ވަގުތީގޮތުން މައްޗަށް ދިޔަނަމަވެސް، ހޫނުމިން ކުޑަކުރުމަށް ކުރެވޭ ކޮންމެ މަސައްކަތަކުންވެސް ބޮޑު ތަފާތެއް ދައްކާނެއެވެ. ނަމަވެސް، ގެއްލުންދެނިވި ގޭސްތައް މަދުކުރުން އެންމެ ފަސްއަހަރަށް ލަސްވިކަމުގައި ވިޔަސް، ދުނިޔޭގެ އެންމެ މަތީ ފިނިހޫނުމިނަށް އިތުރު 0.1 ޑިގްރީ ސެލްސިއަސް އިތުރުވެގެންދާނެކަމަށް އދ. ގެ ރިޕޯޓުގައި ބުނެފައިވެއެވެ.