މަޝްހޫރު ރޮކް ބޭންޑް 'ޕިންކް ފްލޮއިޑް' ގެ ކޯ-ފައުންޑަރ ރޮޖާ ވޯޓާސް، ފަލަސްތީނުގެ އާޓިސްޓެއްގެ ދިރިއުޅުމުގެ މައްޗަށް އުފައްދާ ޑޮކިއުމެންޓްރީ 'ފްރީޑަމް ތިއޭޓާ' ގެ އެގްޒެކެޓިވް ޕްރޮޑިއުސަރެއްގެ ގޮތުގައި ސޮއިކޮށްފިއެވެ.

ފަލަސްތީނުގެ ހައްގުތަކަށް ވަކާލާތުކުރުމުގައި ފާހަގަކޮށްލެވޭ ރޮޖާ ވޯޓާސްއަކީ ވެނިސް ފިލްމު ފެސްޓިވަލްއިން ފަލަސްތީނަށް ތާއީދުކޮށް ފިޔަވަޅުތަކެއް އެޅުމަށް ގޮވާލައި ދާދިފަހުން ނެރުނު އޯޕަން ލެޓާގައި ސޮއިކުރި ސަތޭކައަށްވުރެ ގިނަ އާޓިސްޓުންގެ ތެރޭގައި ހިމެނޭ މީހެކެވެ.

ޑައިރެކްޓަރު ރިޝީ ޕެލްހަމް އުފައްދާ މި ޑޮކިއުމެންޓްރީއަކީ ފަލަސްތީނުގެ ކުރީގެ ރެސިސްޓެންޓް ފައިޓަރ އަދި އާޓިސްޓު އަހުމަދު ތޮބާސީގެ ދިރިއުޅުމާއި، ޖެނީން ރެފިއުޖީ ކޭމްޕުގައި ހުންނަ މަޝްހޫރު "ފްރީޑަމް ތިއޭޓާ" ގެ މައްޗަށް ބިނާކޮށް ތައްޔާރުކުރާ ފިލްމެކެވެ. މި ފިލްމުގައި ފެނިގެންދާނީ އިސްރާއީލުގެ ހަމަލާތަކާއި ހަމަނުޖެހުންތަކުގެ ތެރޭގައިވެސް އެ ތިއޭޓާ ހިންގުމަށް ތޮބާސީ ކުރާ ހިތްވަރުގަދަ މަސައްކަތްތަކެވެ.

މި ފިލްމުގެ ޝޫޓިންގ 5 އަހަރު ދުވަހުގެ މުއްދަތަކަށް ކުރިއަށްގެންގޮސްފައިވާއިރު، މިހާރު ފިލްމު އޮތީ ޕޯސްޓް-ޕްރޮޑަކްޝަންގެ އެންމެ ފަހުގެ މަރުހަލާގައެވެ. ފިލްމުގެ އޮރިޖިނަލް ސައުންޑްޓްރެކް ތައްޔާރުކުރުމުގައި ފަލަސްތީނުގެ މަޝްހޫރު އާޓިސްޓުން ބައިވެރިވެފައިވާއިރު، އޭގެ ތެރޭގައި މަޝްހޫރު ޓެކްނޯ ޑީޖޭ އަދި ޕްރޮޑިއުސަރު ސަމާ އަބްދުލްހާދީ ހިމެނެއެވެ.

ލަންޑަންގެ 'ބޭތުޓަބް ފިލްމްސް' އިން ޕެލްހަމް އަދި ސުޒާން ހާބް ގުޅިގެން ޕްރޮޑިއުސްކުރާ މި ފިލްމުގެ ޓީމުން ދަނީ ބައިނަލްއަގްވާމީ ފިލްމު ފެސްޓިވަލްތަކުގައި ފިލްމު ދެއްކުމަށް ރާވަމުންނެވެ.